चिया बगानको जग्गा आफूले बेचेर कांग्रेसमाथि आरोप लगाउन पाइन्छ, ओली जी: देउवा

३ जेठ, काठमाडौं । नेपाली कांग्रेसका सभापति शेरबहादुर देउवाले गिरीबन्धु टि–स्टेटको जग्गा बिक्री नेपाली कांग्रेसको पालामा नभएको बताएका छन् । उनले गिरीबन्धु टि–स्टेटको जग्गाबारे ओली आफैंले गरेको कुरा हो भन्न किन आपत्ति मानेको भन्दै देउवाले प्रश्न गरेका छन् । 

बिहीबार काठमाडौंमा आयोजित प्रजातान्त्रिक विचार समाजको कार्यक्रमलाई सम्बोधन गर्दै उनले गिरीबन्धु टी–स्टेटको जग्गा बिक्री गर्ने कुरामा कांग्रेसका कुनै पनि सरकारको हात नरहेको बताए । देउवाले आफूले बेचेको जग्गा कांग्रेसले बेच्यो भनेर आरोप लगाएको भन्दै ओली जस्तो नेताले यस्तो कुरा बोल्न नसुहाउने टिप्पणी गरे ।

ओलीले बुधबार एमालेको संसदीय दलको बैठकमा गिरीबन्धु टी–स्टेटको जग्गा कांग्रेसले ७० बिघा बेचेको आरोप लगाएपछि कांग्रेस सभापति देउवाको यस्तो टिप्पणी आएको हो । नेपालको राजनीतिमा ओलीजीले बोलेको कुरा बाहिर आएको गिरीबन्धु टी स्टेटको बारेमा, कांग्रेसको पालामा भएको भनेर, आफूले निर्णय गर्नुहुन्छ, कांग्रेसलाई भन्नुहुन्छ, कहिले कुन बेलामा भयो भन्दिए भइहाल्यो नि, त्यसैले उहाँजस्तो नेताले यस्तो कुरा गर्न सुहाउँदैन, आफूले गरेको कुरालाई गरेको भन्नलाई के को आपत्ति ओली जी, उनले भने । 

बुधबार एमाले संसदीय दलको बैठकलाई सम्बोधन गर्दै अध्यक्ष ओलीले कांग्रेसले एकपल्ट ५१ बिघा र अर्कोपल्ट १९ बिघा गरी गिरीबन्धुको ७० बिघा जग्गा कमिसन खाएर बेचेको दाबी गरेका थिए । कांग्रेसले एमालेको सन्दर्भमा टिप्पणी गर्दा ख्याल गरोस्, जुन गिरीबन्धु टी–स्टेटको कुरा छ, नेपाली कांग्रेसले एकपटक ५१ बिघा, अर्को पटक १९ बिघा कमिसन खाएर सट्टापट्टा गर्ने नाममा बिक्री गरेको हो, ओलीले भनेका थिए । 

ओलीले भनेको ५१ रोपनी जग्गाको अपचलनको योजना स्वयम् एमालेकै सरकारका पाला २०५२ सालमा भएको थियो । त्यस्तै १९ रोपनी जग्गाको साटफेर २०३३ (पञ्चायतकाल) मा भएको अदालती दस्तावेजबाट देखिएको छ । त्यही टी–इस्टेट पछि अदालतले नियम र ऐन बनाएर मात्रै यस्ता कामहरू अगाडि बढाउनु भनेपछि अदालतको आदेशबमोजिम हामीले ऐन बनाएको ओलीले बताएका थिए । 

अदालतले फैसला गरेपछि गिरीबन्धु टि स्टेटको निर्णय कांग्रेसको पालामा भएको कुरा नेकपा एमालेका अध्यक्ष केपी शर्मा ओलीले भनेको कुरा बाहिर आएको भन्दै उनले आफ्नो पालामा भएको निर्णयलाई हो भन्न किन आपत्ति ? देउवाले प्रश्न गरे । अदालतले फैसला गरेपछि गिरीबन्धु टि स्टेटको निर्णय कांग्रेसको पालामा भएको भनेर ओलीजीले बोलेको कुरा बाहिर आएको तर, असत्य बोलेको देउवाले बताए । ओली जस्तो नेताले यस्तो कुरा बोल्न नसुहाउने उनले बताए ।