प्रतिपक्षको अवरोधका बीच सभामुखले बैठक चलाएपछि संसदमा हंगामा

३ जेठ, काठमाडौं । सभामुख देवराज घिमिरेले प्रतिपक्षको वेल घेराउ गरिरहेका बेला संसदको कारबाही प्रक्रिया अघि बढाएका कारण संसदमा ठेलाठेल भएको छ ।  प्रतिनिधिसभा बैठकमा सत्तापक्ष नेकपा एमाले र प्रतिपक्ष नेपाली कांग्रेसका सांसदहरूबीच ठेलाठेलमा भएको हो । 

सभामुख देवराज घिमिरेले नेपाली कांग्रेसको नाराबाजीका बीच गृहमन्त्री रवि लामिछानेलाई बोल्न समय दिएपछि विवाद भएको हो । सभामुखले गृहमन्त्रीलाई समय दिँदा कांग्रेस सांसदहरूले रोष्ट्रममा नाराबाजी गरिरहेका थिए । सहकारीको रकम अपचलनमा गृहमन्त्रीको असंलग्नतालाई लिएर प्रमुख प्रतिपक्षी दलले राखेको संसदीय छानबिन समिति गठन नभएपछि नेपाली कांग्रेसले संसदको बैठक अवरोध गरेको थियो । 

आजको बैठक सुरु हुना साथ कांग्रेसले वेल घेराउसहित नाराबाजी गरेको थियो । सभामुख घिमिरेले नाराबाजीमै राष्ट्रपति कार्यालयको पत्र पढ्दै कार्यसूचीमा प्रवेश गरेका थिए । बुधबार नेकपा एमालेका अध्यक्ष केपी शर्मा ओलीले कांग्रेसको अवरोधले संसद् बन्धक बन्न नसक्ने भन्दै अब संसदको बैठक सञ्चालन हुने बताएका थिए । सभामुख घिमिरेले आज अवरोधमै बैठक सञ्चालन गर्नुलाई नेपाली कांग्रेसका सांसद रामहरि खतिवडाले सभामुखले राजनीतिक दलको आबद्धतालाई कायम राखेको पुष्टि गरेको आरोप लगाए ।

आजको बैठकमा प्रतिपक्षीसहित सबै दल वेलमा आएर नाराबाजी गरेपछि भोलि शुक्रबारसम्म बैठक स्थगित भएको छ । बैठक स्थगित भएको सूचना सुनाएर सभामुख उठेर बाहिरिएका थिए । राष्ट्रिय प्रजातन्त्र पार्टीसहितका दलहरूले सभामुखलाई जबर्जस्ती नगर्न चेतावनी दिँदै संसदीय मर्यादा कायम राख्न सभामुखलाई ध्यानाकर्षण गराए पनि सभामुख थर्काउने रणनीतिमा देखिएका थिए । उनले नाराबाजीको स्वर सानो भएको मौका पारेर बैठक सञ्चालन गरेका थिए ।