अब संसदीय छानबिन समिति नबनेसम्म सदन अघि बढ्दैन : कांग्रेस

३ जेठ, काठमाडौं। नेपाली कांग्रेसका महामन्त्री गगन थापाले सभामुख देवराज घिमिरेको कारण संसदमा मुठभेडको अवस्था आएको बताएका छन् । बिहीबार साँझ संघीय संसद् भवन नयाँ बानेश्वरमा पत्रकार सम्मेलन गरी उनले सभामुख घिमिरेले सदनमा जवरजस्ती कार्यसूचीमा प्रवेश गरेपछि अप्रिय स्थिति सिर्जना भएको बताएका हुन् । 

उनले आज बैठकमा उत्पन्न भएको परिस्थितिको जिम्मेवारी सभामुखले लिनुपर्ने बताए ।  एउटा पार्टीको नेताको आदेशपालकको रूपमा सभामुखको भूमिका रहनु दुखको विषय भएको उनले बताए । ‘यसरी निरन्तर रूपमा जाँदैन भन्ने अपेक्षा गर्छौँ । र उहाँको भूमिका जिम्मेवारी पूर्ण रूपमा निर्वाह गर्न सचेत गराउँछौँ’, थापाले भने । 

अब संसदीय छानबिन समिति नबनेसम्म सदनको काम कारबाही अघि नबढ्ने उनले बताए । ‘गृहमन्त्री, प्रधानमन्त्रीले बोल्ने कुरा हामीले तोक्ने होइन तर संसदीय छानबिन समिति गठन नहुँदा सम्म सदनको काम कारबाही अघि बढ्दैन,’ महामन्त्री थापाले भने ।