भङ्गहा–जनकपुर–जयनगर रेल्वे सेवा तीन दिन बन्द हुने

३ जेठ, जलेश्वर । भङ्गहा–जनकपुर–जयनगर रेल्वे सेवा आउँदो शनिबारदेखि तीन दिनसम्मको लागि बन्द रहने भएको छ । नेपाल रेल्वे कम्पनी लिमिटेडका प्रबन्ध सञ्चालक निरञ्जनकुमार झाले आज एक विज्ञप्त जारी गर्दै यही जेठ ५ गते शनिबारदेखि जेठ ७ गते सोमबारसम्म रेल सेवा पूर्ण रुपमा बन्द रहने जानकारी दिएका हुन् ।  

उनले विज्ञप्तिमा भारतको विहार राज्यको मधुवनी जिल्लाको मधुवनी संसदीय क्षेत्रमा यही जेठ ७ मा लोक सभाको निर्वाचन हुने भएकोले शनिबारदेखि सोमबारसम्म ७२ घण्टाका लागि नेपाल रेल्वे सेवा पूर्ण रुपमा बन्द गरिने बताए । विज्ञप्तिमा रेल्वे सेवा जेठ ८ गतेदेखि  नियमित रुपमा सञ्चालन हुने जनाइएको छ ।