अझै सुरु भएन प्रतिनिधि सभा बैठक, राष्ट्रिय सभा स्थगित

६ जेठ, काठमाडौं । प्रतिनिधि सभाको बैठक अझै सुरु हुन सकेको छैन । विहान ११ बजेबाट २ बजे र त्यसपछि ४ बजेका लागि सारिएको थियो । संसदीय छानबिन समितिका लागि कार्यविधि तय गर्ने विषयमा सत्तापक्ष दल र प्रमुख प्रतिपक्षी दलबिच कुरा नमिल्दा प्रतिनिधि सभा बैठक बस्न नसकेको हो ।   
 
आइतबार बिहान ११ बजेका लागि बोलाइएको बैठक सूचना टाँस गरेर दिउँसो २ बजेसम्मका लागि स्थगित गरिएको थियो । तर दलहरूबिच सहमतिको प्रयास जारी रहेका कारण फेरि स्थगित गरेर अपराह्न साढे ४ बजेको समय निर्धारण गरिएको थियो । 
 
अहिले सभामुख घिमिरेले संघीय संसद् सचिवालयका कर्मचारीहरूसँग छलफल गरिरहेका छन् । समिति गठन गर्ने टिओआरमा सहमति नभए आजको बैठक बस्दै नबसी स्थगित हुने सम्भावना छ ।  

राष्ट्रिय सभाको बैठक भने बस्दै नबसी स्थगित भएको छ । दिउँसो १ बजेर १५ मिनेटका लागि बोलाइएको बैठक दिउँसो ३ बजेर १५ मिनेटमा बस्ने गरी स्थगित भएको थियो । सवा ३ बजे बस्ने भनिएको बैठक पनि बस्दै नबसी सोमबार दिउँसो १ बजेर १५ मिनेटमा बस्ने गरी स्थगित भएको छ ।