लहानमा चिया पसलेको हत्या, एक जना पक्राउ !

लहान । सापटी लिएको रकम फिर्ता नदिएको निहुँमा चिया पसले वृद्धको हत्या गरेको आरोपमा सिरहा प्रहरीले एकलाई पक्राउ गरी आज सार्वजनिक गरेको छ ।

सापटी लिएको रु चार हजार ५०० मध्ये रु तीन हजार फिर्ता नदिएको निहुँमा लहान नगरपालिका–९ गोठटोलका ६९ वर्षीय रतनबहादुर तामाङको हत्या गरेको आरोपमा प्रहरीले सप्तरीको राजविराज नगरपालिका–३ निवासी ५५ वर्षीय ज्ञानबहादुर थापामगरलाई पक्राउ गरी सार्वजनिक गरेको हो ।

धनगढीमाई नगरपालिका–१० स्थित राममन्दिर परिसरबाट पक्राउ परेका थापामगरलाई इलाका प्रहरी कार्यालय लहानमा राखी कर्तव्य ज्यान मुद्दामा अनुसन्धान अघि बढाइएको सिरहाका प्रहरी उपरीक्षक जीवनकुमार श्रेष्ठले जानकारी दिए ।

तामाङको शव गत शनिबार लहान नगरपालिका–१७ स्थित गोबिन्दपुरगढी स्थानको किनारमा फेला परेको थियो । धारिलो हतियार प्रहार गरी तामाङको हत्या भएको घटना प्रकृतिबाट देखिएपछि अनुसन्धान गर्दै जाँदा थापामगरको संलग्नता पाइएकाले पक्राउ गरिएको प्रहरी उपरीक्षक श्रेष्ठले बताए ।

धुलो उडाएपछि सडक अवरुद्ध

टिपरले धुलो उडाएर वातावरण प्रदुषण बनाएकोे भन्दै स्थानीयवासीले आज सिरहाको मिर्चैयामा सडक अवरुद्ध पारेका छन् । सिद्धिचरण राजमार्गअन्तर्गत कटारी सडकखण्डमा ‘ओभरलोड’ गरेर चल्ने टिपरले बाटोमा धुलो उडाएर हैरान बनाएको भन्दै स्थानीयवासीले मिर्चैयाको कटारीचोकमा सडक अवरुद्ध पारेका हुन् ।

सिरहाको चोहर्वास्थित मारुती, सौर्य र कसमस सिमेन्ट उद्योगका लागि चुनढुङ्गा बोक्ने टिपर ठूलो सङ्ख्यामा दिनहुँ चले पनि सडकमा नियमितरूपमा पानी नहाल्दा स्वास्थ्यमा असर पारेकाले बाध्य भएर सडक अवरुद्ध गरेको स्थानीय सञ्जीव यादवले बताए ।