तनहुँको खैरेनीटार जोड्ने सडकको स्तरोन्नती गर्दै निर्माण सुरु

१६ जेठ, स्याङ्जा । पुतलीबजार नगरपालिकाको आर्थिक बर्ष २०८०-०८१ को गौरवको आयोजना अन्तर्गत दुई जिल्ला जोड्ने छोटो दुरीको सडक निर्माण शुरु भएको छ । स्याङ्जा सदरमुकामबाट तनहुँको खैरेनीटार जोड्ने सडकको स्तरोन्नती गर्दै निर्माण सुरु हुने भएको हो । विश्व बैंकको ऋण सहयोग तथा नेपाल सरकारको अनुदानमा नेपाल शहरी शासकीय तथा पूर्वाधार आयोजना अन्तर्गतको नगरपालिकाको रणनीतिक सडक निर्माण हुन लागेको नगरपालिकाले जनाएको छ । 

पुतलीबजार नगरपालिका स्थित प्रगतीनगरवाट सुरु हुने आयोजना ७.६ किलोमिटर सडक पूर्वाधार निर्माण हुने पुतलीबजार नगरपालिकाले पत्रकार सम्मेलन मार्फत जानकारी गराएको छ । कुल ४० करोड ८ लाख ८५ हजार ३ सय ७६ रुपैया लागतमा निर्माण सम्झौता भएको आयोजना सम्झौताको १५ महिनामा निर्माण सम्पन्न हुनुपर्ने छ ।

आयोजना निर्माणको जिम्मा लामा कन्ट्रक्सन प्रा.लि काठमाडाैंले सम्झौता गरेको छ । गत चैत्र २६ सम्झौता गरेको निर्माण कम्पनीले दुई महिनाको अवधिमा ४ प्रतिशत भौतिक प्रगती गरिसकेको नगर प्रमुख तुलसीराम रेग्मीले जानकारी दिए । आयोजनाको काम २०८२ असार २५ गते सम्पन्न गरि सक्नुपर्ने गरी सम्झौता भएको नगर प्रमुख रेग्मीले पत्रकार सम्मेलनमा बताए । 

आयोजना निर्माणका लागि पुतलीबजार नगरपालिकाले स्थानीय नदीजन्य वस्तुको उत्खनन् गर्न दिने भएको छ । नगरपालिकाले नगरको गौरवको आयोजना छोटो समयमा निर्माण गरि सक्नुपर्ने र निर्धारित समयमा सम्पन्न हुन नसकेमा आयोजनाको पूर्ण दायित्व नगरपालिकालाई पर्ने भएकाले नदीजन्य वस्तु उत्खनन र संकलनका लागि मेसिन उपकरण प्रयोग गर्न दिने गरी नगर कार्यपालिकाबाट निर्णय गरिएको नगर प्रमुख रेग्मीले बताए । 

नगर प्रमुख रेग्मीका अनुसार नगरपालिकाले स्थानीय आँधीखोलावाट नदीजन्य वस्तु उत्खननका लागि वातावरणीय प्रभाव मुल्यांकन प्रतिवेदन अनुसार वाड नं १, १४, १० र १३ वाट आँधीखोलाको छिडी र खल्लुवोटवाट ५५ सय घन मिटर नदीजन्य वस्तु उत्खनन गर्न अनुमति दिने निर्णय गरेको जानकारी दिएका छन् ।

आयोजनाका लागि यस अवधीका लागि वाड नं १४ मा नदीवाट ३० मिटर बाहिर अस्थायी क्रसर राख्न समेत अनुमति दिने निर्णय भएको नगर प्रमुख रेग्मीले पत्रकार सम्मेलनमा जानकारी दिए । नगर तथा जिल्लाकै गौरवको आयोजना भएका कारण जिल्ला स्थित सरकारी निकाय, संघ संस्था सबैलाई सहयोग गर्न पत्रकार सम्मेलन मार्फत आग्रह समेत गरे ।

दुई जिल्ला जोड्ने रणनीतिक सडक अन्तर्गतको यो सडक तनहुँको खैरेनीटार सम्म झण्डै २५ किलोमिटर दुरीमा पुग्न सकिने हुनेछ । जुन सडक निर्माण भएपछि खैरेनीटार हुँदै दमौली, मुङलिङ हुँदै पूर्व तर्फका यात्राका लागि निकै सहज वन्ने नगर उपप्रमुख देवी अर्यालले जानकारी दिइन ।

कार्यक्रममा नगरपालिकाका प्रमुख प्रशासकीय अधिकृत चिरञ्जीवी पौडेलका अनुसार आयोजना अन्तर्गत सडक निर्माणको काम यस नगरपालिकाको ३, ८ र ९ नंवर वडामा हुने जानकारी दिए । अन्तराष्ट्रिय मापदण्ड अनुरूप निर्माण हुने सडक ५.५ मिटर चौडाईको अस्पाल्ट, २ मिटर चौडाईको सोल्डर र १ चौडाईको ड्रेन सहित सुरक्षा पर्खाल निर्माण हुनेछ । यो सडक निर्माण भएपछि स्याङ्जावासीलाई सहज हुने नगरपालिकाले जनाएको छ ।