उत्तर प्रदेशमा मोदी गठबन्धनलाई विपक्षीको धक्का

२२ जेठ, काठमाडौं । भारतीय लोकसभा निर्वाचनको मतगणना जारी रहँदा भाजपाको गठबन्धनलाई उत्तर प्रदेशमा धक्का लागेको छ । अधिकांश सीटको मतगणना जारी रहँदा सबैभन्दा धेरै सीट रहेको र भाजपाको एकछत्र विजय हुँदै आएको उत्तर प्रदेशले मोदीको नारामा धक्का दिएको हाे । 

भारतीय सञ्चारमाध्यमले जनाए अनुसार  यसअघि ८० मध्ये ७० भन्दा माथि जितेको बीजेपी प्रारम्भिक चरणमा पछि परेको छ । भारतीय समयअनुसार बिहान साढे ९ बजेसम्मको रुझानमा कांग्रेस र समाजवादी गठबन्धनले उत्तर प्रदेशमा ४२ सीटको अग्रता लिएको छ । त्यसमध्ये समाजवादी पार्टीले मात्र ३७ सीटमा अग्रता लिइरहेको छ । भाजपा ३६ सीटमा अगाडि छ ।

उत्तर प्रदेशको रायबरेली क्षेत्रबाट कांग्रेस नेता राहुल गान्धी धेरै मतान्तरका साथ अगाडि छन् भने यसअघि राहुललाई पराजित गरेकी भाजपाकी स्मृति इरानी अमेठीमा पछि परेकी छन् । यदि उत्तर प्रदेश, विहार र महाराष्ट्रमा यही अवस्था रहेमा भाजपाको बहुमत मुस्किल हुनेछ ।

त्यसो त पछिल्लो रुझानमा बीजेपी नेतृत्वको एनडीए गठबन्धन २७४ स्थानमा अगाडि रहँदा कांग्रेस नेतृत्वको गठबन्धन २२६ सीटमा अगाडि देखिएको छ । समाजवादी पार्टी ३३ सीट, वामपन्थी दल ९ सीट र आम आदमी पार्टी ५ सीटमा अगाडि छ ।