सहकारी ठग्नेलाई जोगाएको भन्दै प्रधानमन्त्रीलाई पोखराका पीडितले देखाए कालोझण्डा, ११ जना पक्राउ

२३ जेठ, पोखरा । सहकारीको रकम अपचलन गर्नेलाई बचाउ गरेको भन्दै पोखराका सहकारी पीडितहरूले प्रधानमन्त्री पुष्पकमल दाहाल प्रचण्डलाई कालो झण्डा देखाएका छन् । प्रधानमन्त्रीलाई कालो झण्डा देखाएपछि पीडितहरुमाथि प्रहरीले दमन गरेको छ । दुईजना घाइते भएका छन् । 

बुधबार बिहान पोखरा सभागृहमा प्रवेश गर्ने क्रममा प्रधानमन्त्री प्रचण्डलाई सूर्यदर्शन सहकारीका पीडितहरूले कालो झण्डा र ब्यानर देखाएका हुन् । उनीहरुले ‘सहकारी पीडितलाई न्याय दे’ भन्ने नारा पनि लगाएका थिए । कालो झण्डा र ब्यानर देखाउने ११ जनालाई प्रहरीले नियन्त्रणमा लिएको छ । दुई जना प्रहरीको कुटाइबाट घाइते भएका छन् । घाइतेहरूलाई उपचारका लागि अस्पताल लगिएको छ ।

पोखरा स्वास्थ्य विज्ञान प्रतिष्ठानको सिनेट बैठकमा सहभागी भएर पार्टी प्रशिक्षण कार्यक्रममा जाँदै गर्दा सहकारी पीडितले कालो झण्डा र ब्यानर देखाएका हुन् । प्रधानमन्त्री गण्डकी प्रदेशस्तरीय कार्यकर्ता प्रशिक्षण कार्यक्रम लगायतमा सहभागी हुन मंगलबार पोखरा आएका थिए ।