पूर्ण इजलासमा पठाइयो कोशी सरकारविरुद्धको रिट, २७ गतेलाई पेसी

२३ जेठ, काठमाडौं । कोशी सरकार गठन विरुद्धको मुद्दा पूर्ण इजलासमा गएको छ । सर्वोच्च अदालतका न्यायाधीश तिलप्रसाद श्रेष्ठ र बालकृष्ण ढकालको संयुक्त इजलासले पूर्ण इजलासमा पठाउने आदेश गरेको छ । आज यो रिट तेस्रो नम्बरमा पेशी चढेको थियो । 

कोशीमा संविधान विपरीत मुख्यमन्त्रीको नियुक्ति भएको भन्दै पूर्वमुख्यमन्त्री केदार कार्कीले दायर गरेको रिटमा अन्तरिम आदेश माग गरिएको छ । तर, एक न्यायाधीशको एकपटक र दुई न्यायाधीशको इजलासमा दुईपटक पेसी तोकिए पनि सुनुवाइ नै पूर्ण इजलासमा परेको छ । अब जेठ २७ गतेलाई पेसी तोकिएको छ ।

कार्कीले दायर गरेको रिटमा यसअघि १६ जेठमा  मनोजकुमार शर्मा र शारङ्गा सुवेदीको इजलासमा परेको थियो । तर, हेर्न नभ्याइनेमा परेकाले सुनुवाइ भएन । संविधानको धारा १६८ को उपधारा ५ अनुसार २७ असोज २०८० मा मुख्यमन्त्री बनेका कार्कीले अल्पमतमा परेको ३० दिनसम्म विश्वासको मत नलिएपछि २६ वैशाखमा प्रदेश प्रमुखले स्वतः पदमुक्त भएको घोषणा गर्दै सोही उपधारा अनुसार नयाँ सरकार गठन आह्वान गरेका थिए । 

सोही अनुसार २७ वैशाखमा प्रदेश प्रमुखले एमालेका हिक्मतकुमार कार्कीलाई मुख्यमन्त्री नियुक्त गरेका थिए । उपधारा ५ अनुसार नै मुख्यमन्त्री बनेका कार्कीलाई एमाले र माओवादी केन्द्रका ५२ सांसदको समर्थन छ । सरकार गठन विरुद्ध २७ वैशाखमा नै केदार कार्कीले सर्वोच्च अदालतमा रिट दायर गरेका थिए । सर्वोच्च अदालतले २८ वैशाखमा प्रतिवादीको जवाफ माग गरेको थियो । ९ जेठमा अदालतले मुख्यमन्त्री नियुक्तिको प्रक्रियाको कागजात झिकाउने आदेश गरेको थियो ।