परपुरूषसँग भेटेपछि सेनाका अमल्दारले गरे श्रीमतीको हत्या, साथमा रहेका युवा पनि गम्भीर

२५ जेठ, दाङ । दाङको तुलसीपुरमा नेपाली सेनाका अमल्दारले खुकुरी प्रहार गरी श्रीमतीको हत्या गरेका छन् । घर विदामा आएका बेला २७ वर्षीया श्रीमती टीका बुढाथोकीलाई आज बिहान परपुरुषसँग आपत्तिजनक अवस्थामा भेटेपछि ३६ वर्षीय अमल्दार शालिकराम बुढाथोकीले खुकुरी प्रहार गरेका हुन् । खुकुरी प्रहारबाट घाइते भएकी टीकाको राप्ती प्रादेशिक अस्पतालमा उपचारका क्रममा मृत्यु भएको प्रहरीले जनाएको छ । 

कपुरकोट ६ सल्यान घर भएका बुढाथोकी नेपाली सेनाको ज्वालादल गण बारामा कार्यरत थिए भने श्रीमती टीका तुलसीपुर ६ डुम्री गाउँमा डेरामा बस्ने गर्थिन् ।  शालिकरामले श्रीमतीका साथमा फेला परेका आर्यन थापालाई समेत खुकुरी प्रहार गरेका छन् । थापाको गर्धन र टाउकोमा गम्भीर चोट लागेकाले उनको अवस्था पनि गम्भीर भएको प्रहरीले जनाएको छ ।

प्रहरीका अनुसार अछाम घर भएका आर्यन पनि नेपाली सेना हुन् भने उनी तुलसीपुरस्थित १९ नम्बर बाहिनीमा कार्यरत छन् ।  शालिकरामलाई नियन्त्रणमा लिएर अनुसन्धान गरिरहेको प्रहरीले जनाएको छ ।