यसरी मनाइन्छ हाँडीगाउँमा गाडीरहित दिन 'कार फ्री डे'

मनिष अर्याल / नेपाल फोटो लाइब्रेरी 

२६ जेठ, काठमाडौं । काठमाडौं महानगपालिकाले झन्डै एक वर्ष देखि प्रत्येक शनिबार हाँडीगाउँमा गाडीरहित दिन 'कार फ्री डे' मनाइँदै आइएको छ । हाँडीगाउँ गुरुयोजना अन्तर्गत सुधारका क्षेत्रमध्ये वातावरणीय सुधारका लागि दथु टोल कृष्ण मन्दिर, डवली चोक हुँदै कोटालटोल भवरकुँसम्म सडक खण्डमा सवारी प्रवेश निषेध गरिएको छ ।

 यस क्षेत्रमा दिउँसो २ बजेदेखि बेलुका ८ बजेसम्म सवारी साधन प्रवेशमा रोक लगाइएको थियो । यस क्षेत्र भएर गुड्ने सवारी साधनलाई धोबीखोला कोरिडोर, गहना पोखरीबाट वडा कार्यालय तर्फको भित्री सडकको प्रयोग गर्ने व्यवस्था मिलाइएको छ । 

हाँडीगाउँलाई पूर्व लिच्छवि, बर्मा तथा लिच्छवि कालको संस्कृति र सम्पदाको लागि सर्वाधिक प्राचीन स्थानको रुपमा लिइन्छ । यहाँ भएका सत्यनारायण परिसरमा प्राचीन बस्ती र पूर्व लिच्छवि कालका मन्दिरहरू भएको प्रमाण पाइन्छ ।

इसापूर्व दोश्रो शताब्दीका पुरातात्त्विक अवशेष र अन्य सम्पदा भवनहरूको जग यसै क्षेत्रमा मात्र छन् । स्थानीयहरू दुइ बजे पछि सडक छेउमा नेवारी स्वादका परिकारहरू बनाउन व्यस्त देखिन्छन । बालबालिकाहरू निर्धक्क भएर सडकमा खेलिरहेको देख्न सकिन्छ ।