सत्तापक्षको ह्वीप विपरित विश्वासको मत दिएका देवकोटालाई माओवादीले सोध्यो स्पष्टीकरण

३० जेठ, पोखरा । सत्तापक्षको ह्विप विपरीत गण्डकी प्रदेशका मुख्यमन्त्री  सुरेन्द्रराज पाण्डेलाई विश्वासको मत दिएका सांसद तथा नेपाल समाजवादी पार्टी (नेसपा)का नेता फणीन्द्र देवकोटालाई माओवादीले स्पष्टीकरण सोधेको छ । उनी माओवादीको चुनाव चिन्हबाट चुनाव लडेर निर्वाचित भएका थिए । 
 
नेकपा माओवादी केन्द्र गण्डकी प्रदेश संसदीय दलले उनलाई बुधबार साँझ ७ बजेभित्र लिखित जवाफ पठाउन निर्देशन दिएको छ । देवकोटाले फ्लोर क्रस गरेपछि त्यसको जानकारी सोमबार नै पार्टी केन्द्रीय कार्यालयमा संसदीय दलको कार्यालयले पठाएको र केन्द्रको सहमतिमा प्रदेश संसदीय दलले स्पष्टीकरण सोध्ने निर्णय गरेको हो । 

मंगलबार साँझ नै उनलाई स्पष्टीकरण सोधेको पत्र पठाइएको प्रमुख सचेतक कुसुम बुढाले जानकारी दिइन् । दलको विधान विपरीत काम गरेको र ह्विप उल्लंघन गरेको हुँदा केन्द्रको सुझावका आधारमा स्पष्टीकरण सोधेको उनले बताइन ।