पपुवा न्युगिनी ७ विकेटले पराजित, अफगानिस्तान विश्वकपको सुपर ८ मा

३२ जेठ, काठमाडौं । आईसीसी टी– २० विश्वकप क्रिकेटमा पपुवा न्युगिनी (पीएनजी)लाई हराउँदै अफगानिस्तान सुपर ८ मा प्रवेश गरेको छ ।  शुक्रबार बिहान सम्पन्न खेलमा पपुवा न्यु गिनीलाई ७ विकेटले हराउँदै अफगानिस्तान सुपर–८ मा पुगेको हो । 

टस हारी पहिले ब्याटिङको निम्तो पाएको पपुवा न्यु गिनीले १९.५ ओभरमा अलआउट हुनुअघि ९५ रनमात्र बनाउन सक्यो । जवाफी ब्याटिङमा ओर्लिएको अफगानिस्तानले भने १५.१ ओभरमा केवल तीन विकेट गुमाएर लक्ष्य भेट्टाएको हो ।  

अफगानिस्तान समूह ‘सी’ बाट सुपर–८ चरणमा पुगेको हो । यसअघि सोही समूहबाट वेस्ट इन्डिज सुपर–८ चरणमा पुगिसकेको छ । उक्त समूहमा रहेका अन्य टोली पपुवा न्यु गिनी, युगान्डा र न्युजिल्यान्ड भने घर फर्किने निश्चित भएको छ । यस समूहबाट अब न्युजिल्यान्डले युगान्डाको, पपुवा न्यु गिनीले न्युजिल्यान्डको र वेस्ट इन्डिजले अफगानिस्तानको सामना गर्नेछन् ।