सशस्त्र प्रहरी बल नेपाल प्रधान कार्यालयमा योग विज्ञान शिविर

४ असार, काठमाडौं । सशस्त्र प्रहरी बल नेपालको आयोजनामा पतञ्जली योग समितिले‘१०औँ अन्तर्राष्ट्रिय योग दिवस’को अवसरमा प्रधान कार्यालय हल्चोकस्थित नेपाल एपीएफ रंगशालामा योग विज्ञान शिविर संचालन गरेको छ ।

सशस्त्र प्रहरी महानिरीक्षक राजु अर्यालको प्रमुख आतिथ्यमा सम्पन्न भएको योग विज्ञान शिविरमा अवकाश प्राप्त सशस्त्र प्रहरी महानिरीक्षक, सशस्त्र प्रहरी अतिरिक्त महानिरीक्षकहरू, सशस्त्र प्रहरी परिवार महिला संघका पदाधिकारी, पतञ्जली योग समितिका पदाधिकारी लगायत सशस्त्र प्रहरी बल नेपालका वरिष्ठ अधिकृत, सिनियर तथा जुनियर अधिकृत तथा विल्लादार जवानहरूको समेत उपस्थिति रहेको थियो ।

महानिरीक्षक अर्यालले शारीरिक रुपमा स्वास्थ्य, मानसिक तवरणले शान्त र आध्यात्मिक हुनुको लागि योग अभ्यास निकै आवश्यक रहेको बताउँदै योगले राष्ट्रसेवक कर्मचारीहरूलाई समेत उर्जा प्रदान गर्ने बताए ।

उनले विगत केही वर्षदेखि सशस्त्र प्रहरी बल नेपालका सम्पूर्ण युनिटहरूमा अन्तर्राष्ट्रिय योग दिवस तथा अन्य अवसरहरूमा समेत योग अभ्यास संचालन गर्दै आइरहेको चर्चा गर्नुहुँदै सुरक्षा निकायमा गरिने कसरत र अभ्यासले शारीरिक रुपमा तन्दुरुस्त बनाउने र मानसिक रुपमा तन्दुरुस्त हुन योग अभ्यास आवश्यक रहेको बताए ।

महानिरीक्षक अर्यालले निकट भविष्यमा समेत सशस्त्र प्रहरी बल नेपाल र पतञ्जली योग समितिको सम्बन्ध अझै बढि प्रगाढ हुने विश्वास व्यक्त गर्नुहुँदै योग शिविर संचालनमा प्रत्यक्ष रुपमा सहयोग पुर्याउने पतञ्जली योग समिति तथा योग गुरुहरूप्रति हार्दिक आभार प्रकट गरे ।

सोही अवसरमा पतञ्जली योग पिठका ट्रष्टी ई.शालिग्राम सिंह र पूर्व प्रहरी नायव महानिरीक्षक ज्ञानेन्द्र बिक्रम महतले स्वागत तथा शुभकामना मन्तव्य व्यक्त गरे ।