दूधको भुक्तानी माग्न डीडीसीको कार्यालय लैनचौर पुगेका किसानमाथि प्रहरीको धरपकड

५ असार, काठमाडौं । दूधको भुक्तानी माग्न गएका दुग्ध किसानहरूलाई प्रहरीले नियन्त्रणमा लिएको छ । दूधको भुक्तानी तत्काल दिन माग गर्दै बुधवार उनीहरुले दुग्ध विकास संस्थान केन्द्रीय कार्यालय घेराउ गर्न पुगेका थिए । 

केन्द्रीय दुग्ध सहकारी संघको अगुवाइमा पूर्व निर्धारित कार्यक्रमअनुसार बुधबार डीडीसीको कार्यालयमा तालाबन्दी र घेराउ गर्न जाँदा दुग्ध किसानहरूलाई प्रहरीले पक्राउ गरी सोर्‍हखुट्टे प्रहरी कार्यालयमा लगेको छ । किसानहरू केन्द्रीय कार्यालयमा तालाबन्दी गर्न खोज्दा प्रहरीले रोक्न खोजेको थियो । 

त्यस क्रममा प्रहरी र किसानबीच सामान्य झडपसमेत भएको छ । प्रहरीले किसानलाई लछार पछार गर्दै धरपकड गरेको थियो । संघका महासचिव राम आचार्यका अनुसार शान्तिपूर्ण आन्दोलनमा डीडीसीले हस्तक्षेप गरी करिब डेढ सय जना किसानलाई पक्राउ गर्न लगाएको बताए ।

विभिन्न जिल्लाबाट ५ सयको संख्यामा बिहानैदेखि डीडीसीको केन्द्रिय कार्यालयमा जम्मा हुँदै थियौं, हामी शान्तिपूर्ण आन्दोलन सुरु गर्न नपाउँदै डीडीसीको निमित्त महाप्रबन्धक राजेन्द्र अधिकारी र अध्यक्ष बेदबहादुर क्षेत्रीको उजुरीको आधारमा प्रहरीले करिब डेढ सय किसानलाई पक्राउ गरी सोर्‍हखुट्टे प्रहरी कार्यालय लगेको छ,उनले भने ।

आचार्यले दूध खरिद गरेवापत बक्यौंता रकम माग्न शान्तिपूर्ण आन्दोलन गर्दा डीडीसीले किसानहरुसँग अभद्र व्यवहार र पक्राउ गरेको घटनाप्रति खेद व्यक्त गरे । अहिले प्रहरीले डीडीसीलाई चारैतर्फबाट घेरा हाली सुरक्षा प्रदान गरेको छ । उता किसानहरु पनि ठूलो संख्यामा लैनचौर क्षेत्रमा जम्मा भइरहेका छन् । 

डीडीसीले किसानलाई दूध खरिद गरेवापत करिब ७ महिनाको २ अर्ब हाराहारीमा भुक्तानी गर्न बाँकी छ । दुग्ध किसानहरुले जेठ २५ गतेदेखि असार ४ गतेसम्म देशभर नै हातमा कालोपट्टी बाँधेर दूध संकलनको कार्यक्रम आयोजना गरेको थियो ।

यसअघि अर्थ मन्त्रालयले वार्षिक ५ प्रतिशत ब्याजदरमा डीडीसीलाई ३० करोड रुपैयाँ उपलब्ध गराएको थियो । चैत अन्तिम सातासम्म डीडीसीले किसानलाई १ अर्ब ४० करोड रुपैयाँ भुक्तानी गर्न बाँकी थियो । त्यसमध्ये डीडीसीले सरकारबाट प्राप्त गरेको ३० करोड र आन्तरिक स्रोतबाट ७ करोड परिचालन गरी ४० करोड रुपैयाँ किसानलाई भुक्तानी गरेको थियो ।

अर्कोतर्फ नीजि क्षेत्रका डेरी उद्योगहरुबाट पनि करिब ४ अर्ब रुपैयाँ भुक्तानी हुन बाँकी छ । चैतको अन्तिम सातासम्म नीजि क्षेत्रबाट भुक्तानी नहुँदा ३ अर्ब ६० करोड रुपैयाँ पुगेको थियो । नियमअनुसार किसानलाई हरेक १५ दिनको अन्तरालमा दुध खरिद गरेवापतको रकम भुक्तानी गर्नुपर्ने हुन्छ । तर डीडीसीदेखि नीजि क्षेत्रका डेरी उद्योगहरुले ५ देखि ७ महिनाको भुक्तानी गर्न नसकेको जनाइएको छ ।