गण्डकीका सांसद देवकोटाले माओवादीको कारवाहीविरुद्ध सर्वोच्चमा दिए रिट

६ असार, पोखरा । नेकपा माओवादीबाट सांसद पदमा नरहने गरी गरेको कारवाहीविरुद्ध गण्डकी प्रदेशका सांसद फणन्द्रि देवकोटाले सर्वोच्च अदालतमा रिट निवेदन दिएका छन् । पार्टीको निर्देशन विपरित ह्वीप उल्लंघन गरेको आरोपमा माओवादीले कारबाही गरेको थियो । 

नेपाल समाजवादी पार्टीका नेता रहेका देवकोटाले २८ जेठमा माओवादी संसदीय दलको निर्णयविरुद्ध देवकोटाले मुख्यमन्त्री सुरेन्द्रराज पाण्डेलाई विश्वासको मत दिएका थिए । त्यसपछि माओजवादी केन्द्रले उनलाई ह्वीप उल्लंघन गरेको भन्दै कारबाही गरेको थियो । माओवादीको कारबाही गर्ने निर्णय ३२ जेठमा सभामुख कृष्णप्रसाद धितालले प्रदेशसभा बैठकमा पढेर सुनाएपछि देवकोटा पदमुक्त भएका थिए ।

देवकोटाले बिहीबार सर्वोच्चमा दायर रिटमा आफूलाई माओवादी संसदीय दलले गरेको कारबाही र त्यस आधारमा सभामुख धितालले प्रदेशसभामा वाचन गरेको पत्र खारेज गर्न माग गरेका छन् । उनले आफू नेपाल समाजवादी पार्टीको प्रदेश सभा सदस्यको हैसियतले कार्य गर्न दिनु भनी परमादेश मागेका छन् । मौलिक र कानूनी हक प्रचलन गरी न्याय दिलाई पाऊँ,’ देवकोटाले रिटमा भनेका छन् ।

रिटको अन्तिम टुंगो नलागेसम्म प्रदेश सभा सदस्यको हैसियतमा पूर्ववत कामकाज गर्न कुनै अवरोध नगर्नू, कामकाज गर्न दिनू भनी सर्वोच्च अदालत नियमावलीअनुसार अन्तरिम आदेश जारी गर्न देवकोटाले माग गरेका छन् ।