वर्षाले जलमग्न भैरहवा, अधिकांस पसलमा पानी पस्यो (फोटोफिचर)

१६ असार, भैरहवा । आइतबार केहीबेर भारी वर्षा हुँदा भैरहवाको बैंकरोडका अधिकांस क्षेत्र जलमग्न भएको छ । वर्षाले बैंकरोडसहित प्रहरी टोल, मिलनचोक, मैत्री पथ लगायतका भैरहवाको मुख्य बजारनै जलमग्न भएको हो । पानीको निकास नभएको कारण सडकमा पानी जमेको छ । नालबाट पानी 'ओभर फ्लो' भएसँगै पसलहरुमा पनि पानी पसेको छ । 

घाम लाग्दा धुलो उड्ने समस्या झेल्दै आएका नगरवासी पानी परेपछि भने हिलाम्यको समस्या खेप्दै आएका छन । भैरहवाको मुख्य बजार बैकरोड मिलनचोकमा पानी जम्दा सवारी चालक र पैदलयात्रीलाई आवतजावतमा प्रहरीले केही समय रोक लगाएको थियो । जिल्ला प्रहरी कार्यालय, भीम अस्पतालको परिसरमा पानी जमेको छ भने अस्पताल अगाडि रहेका पसलहरूमा पानी पसेको छ । 

नगर क्षेत्रमा भइरहेको सडक निर्माणसँगै ढल र नाला निर्माणको काम अव्यवस्थित हुँदा केही घण्टा मात्र परेको वर्षाको पानीले निकास नपाउँदा जलमग्न हुने गरेको छ ।