रोल्पामा जीप दुर्घटना हुँदा ७ जनाको मृत्यु, ७ घाइते

१७ असार, लिवाङ । रोल्पाको पश्चिम तालाबाङ परेवा छहरामा जीप दुर्घटना हुँदा ७ जनाको मृत्यु भएको छ भने ७ जना घाइते भएका छन् । सोमबार दिउँसो ४ बजे लु १ ज ३२५२ नम्बरको जिप माडी गाउँपालिका –३ परेवा छहरा नजिकै दुर्घटना हुँदा ५ जनाको घटनास्थलमै र २ जनाको जिल्ला अस्पतालमा उपचारका क्रममा मृत्यु भएको हो । माडी गाउँपालिकाका अध्यक्ष अमरसिंह घर्तीले अहिले पनि पानी परिरहेकाले सबै घाइतेलाई अस्पताल पुराउन नसकिएको बताएका छन् ।

जिल्ला प्रहरी कार्यालयका अनुसार मृतकको सनाखत भइसकेको छैन। दुर्घटनास्थल सदरमुकाम लिबाङबाट करिब ३५ किलोमिटर पश्चिम पर्दछ। घटनापछि पनि निरन्तर पानी परिरहेकाले समयमा उद्धार हुन नसकेको प्रहरीले जनाएको छ ।