प्रस्तावित निर्वाचन आयुक्त प्रधानविरुद्ध इच्छाविपरीत र बन्धक बनाएर यौन सम्पर्क राखेका पाँच उजुरी

१९ असार, काठमाडौं । संवैधानिक परिषदले निर्वाचन आयोगको निर्वाचन आयुक्तमा सिफारिस गरेका कृष्णमान प्रधान विरुद्ध संसदीय सुनुवाइ समितिमा यौन दुर्व्यवहार सम्बन्धका ५ उजुरी परेका छन् । सबै उजुरी यौन अपराधसँग सम्बन्धित छन् । 

प्रधान यसअघि नेपाल कानुन आयोगको कार्यकारी निर्देशक भएको समयमा आफूलाई कार्यालयमै इच्छा विपरीत यौन सम्पर्क गरेको भन्दै एक महिलाले उजुरी दिएकी छन् । अरु चार उजुरी पनि यौनसँग सम्बन्धित छन् । काम लगाइदिने बहानामा प्रधानले बन्धक जस्तै बनाएर यौन सम्पर्क गर्ने गरेको अर्को उजुरीमा उल्लेख छ । कार्यालयमा जागिर खोज्दै आएकी एक महिलालाई इच्छा विपरीत यौन सम्पर्क गरेको र घटना मिलाउन एक करोड रुपैयाँ दिएको पनि उजुरीमा उल्लेख छ ।

२ असारमा बसेको संवैधानिक परिषदको बैठकले प्रधानलाई निर्वाचन आयोगको आयुक्तमा नियुक्ति सिफारिस गरेको थियो । नियुक्ति सिफारिसको पत्र पाएपछि संसदीय सुनुवाइ समितिले प्रधान विरुद्ध ७ असारमा १० दिन समय दिएर उजुरी आह्वान गरेको थियो । सुनुवाइ समितिले प्राप्त उजुरीहरू समितिका सदस्यहरूलाई वितरण गरिसकेको जानकारी दिएको छ । 

प्रस्तावित आयुक्त प्रावधानविरुद्ध प्राप्त उजुरीहरूमाथि बिहीबार समितिमा छलफल हुनेछ । उजुरीकर्ताले कुन मितिमा कुन बैंकमा कुन खाता नम्बरबाट कति पैसा जम्मा भएको हो भन्ने विवरण नै समितिलाई उपलब्ध गराएका छन् । ५० लाख र २५ लाख रुपैयाँको चेकका साथमा नगद बैंक खातामा बचत गरेको प्रमाण पनि उजुरीसँगै समावेश गरिएको छ ।

सुनुवाइ समितिमा पुगेको उजुरीमा यो विषय अदालतमा पुगेर मिलापत्र भएको पनि उल्लेख छ । उजुरीमा उल्लेख भए अनुसार २४ भदौ २०८० मा पीडित महिलाले काठमाडौं जिल्ला अदालतमा यौन दुर्व्यवहारको मुद्दा दर्ता गरेकी थिइन् । २९ भदौ २०८० मा उजुरीकर्ता र प्रधानले मिलापत्रका लागि संयुक्त निवेदन दिएका थिए । सोही दिन अदालतमा दुवै पक्षबीच मिलापत्र भएको उजुरीकर्ताले उल्लेख छ ।