सुदूरपश्चिम सरकारबाट बाहिरिने एमालेको निर्णय, संकटमा परे मुख्यमन्त्री सोडारी

२० असार, धनगढी । सुदूरपश्चिम सरकारबाट एमाले बाहिरिने भएको छ । नेकपा एकीकृत समाजवादी नेतृत्वको सुदूरपश्चिम प्रदेश सरकारमा मुख्य साझेदार दल एमालेले समर्थन फिर्ता लिने निर्णय गरेसँगै सरकार संकटमा परेको छ । एमाले मन्त्रीहरुले राजीनामा दिने निर्णय गरेका छन् । 

बिहीबार दिउँसो संसदीय दलको बैठकबाट समर्थन फिर्ता र मन्त्रीहरुको राजीनामा दिने निर्णय भएको संसदीय दलका नेता राजेन्द्रसिंह रावलले बताए । केहीबेरमा पत्र बुझाउन मुख्यमन्त्री कार्यालय जाने तयारी छ,’ रावलले भने । एमालेले समर्थन फिर्ता लिने निर्णय गरेसँगै मुख्यमन्त्री दीर्घबहादुर सोडारी अल्पमतमा परेका छन् ।

एमालेबाट सोडारी सरकारमा तीन जना मन्त्री छन् । सुरेन्द्रबहादुर पाल आर्थिक मामिला, विरबहादुर थापा वन वातावरण तथा सहकारी र हीरा सार्की आन्तरिक मामिलामन्त्री छन् ।

उनीहरु मन्त्री नियुक्त भएको एक महिना पनि पुगेको छैन । जेठ २८ गते मन्त्री नियुक्त भएका उनीहरुमध्ये पाललाई मात्रै मन्त्रालय तोकिएको थियो । त्यसबेला बिनाविभागीय मन्त्री नियुक्त भएका थापा र सार्कीलाई असार १६ गते विभागीय जिम्मेवारी तोकिएको थियो । अर्थात् थापा र सार्की ४ दिनमात्रै विभागीय मन्त्री भएका छन् ।