एमाले कार्यालयभित्रै पस्यो मनोहरा खोला ( फोटो फिचर )

२२ असार, काठमाडौं । निरन्तरको वर्षाका कारण मनोहरा खोलामा जलसतह बढेपछि शनिबार दिउँसो एमाले कार्यालयभित्रै बाढी पसेको छ । खोलामा पानीको सतह पुल भन्दा पनि उचाइमा पुगेपछि नजिकै रहेको एमाले कार्यालयभित्र बाढी पसेको हो ।

च्यासलमा मनोहरा करिडोर सडक पनि डुबानमा परेको छ । एमाले कार्यालय नजिकै रहेको च्यासल रंगशाला पनि डुबानमा परेको छ । पानीले भरिएपछि रंगशाला पोखरीजस्तो बनेको छ ।

काठमाडौँ उपत्यकामा रहेका नदी तथा खोलामा पानीको बहाव बढेका कारण केही स्थानको आवागमनमा प्रभाव परेको छ । बल्खुस्थित तरकारी बजार जाने बाटो र पार्किङ क्षेत्रमा खोलाको पानी पसेका कारण आवागमन रोकिएको छ । 

यस्तै कुपण्डोल पुल मुनीको करिडोर, टंकेश्वर र टेकु क्षेत्रमा रहेका करिडोरमा पनि खोलाको पानी सडकमै आएका कारण सवारी आवागमन प्रभावित भएको छ । 

शंखमूल, युएन पुल, रोजबर्ड स्कुल नजिक, सानेपा कालोपुलको तल्लो बाटो र बालकुमारी च्यासल थापाथलीमा रहेका करिडोरमा पनि विष्णुमती नदीको वहाव बढेर पानी सडकमै आएका कारण सवारी आवात जावतमा आशिंक प्रभाव परेको छ । प्रहरीले लगातारको बर्षापछि नदी आसपासका क्षेत्रमा सतर्कता अपनाउन स्थानीयलाई आग्रह गरेको छ । 

यस्तै धापाखेल स्थित सुमेरु अस्पताल नजिकै पनि वर्षातको पानी जमेका कारण सवारी आवागमनमा आशिंक प्रभाव परेको छ । काठमाडौँ उपत्यकाका विभिन्न करिडोर हुँदै यात्रा गर्दा सचेत भएर यात्रा गर्न सडक प्रयोगकर्तालाई  ट्राफिक प्रहरीले अनुरोध गरेको छ ।