मन्त्री र प्रधानमन्त्री नआएको भन्दै कांग्रेसको ध्यानाकर्षण, सदनप्रति उत्तरदायी हुन आग्रह

२५ असार, काठमाडौं । नेपाली कांग्रेसले सरकार संसदप्रति उत्तरदायी नभएको भन्दै ध्यानाकर्षण गराएको छ । मंगलबार प्रतिनिधिसभा बैठकमा मन्त्री, प्रधानमन्त्रीको उपस्थिति नभएको भन्दै आकस्मिक समयमा कांग्रेसले ध्यानाकर्षण गराएको हो । 

कांग्रेसका प्रमुख सचेतक रमेश लेखकले मन्त्रीहरू सदनप्रति उत्तरदायी नभएको बताए । अविरल वर्षाका कारण देशभर भएको जनधनको क्षति र सरकारले गरेका कामबारे सदनलाई जानकारी गराउन उनले आग्रह गरे । उनले कञ्चनपुरमा वर्षाका कारण भएको क्षतिका बारेमा सरकारको ध्यानाकर्षण गराए ।

सदनमा मन्त्री, प्रधानमन्त्रीको उपस्थिति नभएको भन्दै उनले सरकारको ध्यानाकर्षण गराउँदै हिजो पनि माननीयज्यूहरुले भन्नुभयो– सरकार विश्वासको मत लिने तयारी गरेको छ । संविधानअनुसार सरकारले पाउनुपर्ने समय पाउनुपर्छ भन्ने कुरा उठेको बताए । उनले सरकारले पूरै ३० दिन लियोस्, २१ दिन थपे पनि भयो, केही समस्या भएन । तर, सरकार हुन्जेल सदनप्रति उत्तरदायी हुनुपर्ने बताए ।