अख्तियारले अनुसन्धान गरिरहेको नेपाल टेलिकमको विलिङ सिष्टमको ठेक्का प्रकरणमा फेरी चलखेल

२७ असार, काठमाडौं । अख्तियार दुरुपयोग अनुसन्धान आयोगले नेपाल टेलिकमको बिलिङ सिष्टमको ठेक्का प्रकरणमा अनुसन्धान गरिरहेका बेला टेन्डर आह्वान भइसकेपछि पनि लागत फेरि बढाउन चलखेल भइरहेको छ । लागत बढाउनकै लागि बिलिङ प्रणाली उपलब्ध गराउने विदेशी कम्पनीका नेपालस्थित एजेन्टहरूले लागत बढाउनकै लागि अहिलेको टेन्डर प्रक्रिया नै रद्द गराउन लागिपरेको स्रोतको दावी छ ।

एनसेल लगायतका निजी क्षेत्रबाट प्रतिस्पर्धामा रहेका कम्पनीहरूले राम्रो आय आर्जन गरिरहेका बेला विलिङ प्रणालीका कारण कम्पनीलाई बर्सेनि अर्बौं नोक्सानी हुने गरेको छ । तर टेलिकमका कर्मचारीहरुकै मिलेमतोमा मर्मत सम्भारकै नाममा अर्बौंको ठेक्का लगाएर नयाँ प्रणाली खरिदलाई टार्दै आएका यसअघिका प्रबन्ध निर्देशक सुनिल पौडेल भ्रष्टाचारी ठहर भइसकेका छन् ।  

पौडेल निलम्बनमा परेकै अवस्थामा कायममुकायम प्रबन्ध निर्देशक संगीता पहाडीले बिलिङको टेन्डर अगाडि बढाएकी थिइन् । अख्तियारले समेत अघि नबढाउनु भनेको बेला टेण्डर प्रकृया अघि बढाइएको थियो । टेन्डर अहिले पनि प्रक्रियामै रहेको छ । यसअघि सञ्चार तथा सूचना प्रविधि मन्त्रालयले गरेको अध्ययनले पनि तत्काल नयाँ बिलिङ प्रणाली जडान गर्न सिफारिस गरेको थियो । विभिन्न अध्ययन तथा अवस्थाले नयाँ बिलिङ प्रणाली राख्नुपर्ने भन्दै टेलिकमले टेन्डर आह्वान गरेको थियो ।

कम्पनीले नयाँ बिलिङ प्रणालीका लागि गरिएको टेन्डरबाट राम्रा कम्पनी आउन नसक्ने भन्दै विदेशी कम्पनीका एजेन्टहरूले लबिङ बढाएका छन् । यसमा मुख्य कम्पनीमा नेटक्रयाकर भन्ने कम्पनी रहेको छ । बिलिङ तथा अन्य अफिस म्यानेजमेन्ट प्रणालीको विकासमा काम गर्दै आएको यो कम्पनीका प्रतिनिधि अहिलेको टेन्डर रोक्न तीब्र लबिङमा छन् ।  त्यस्तै सीएसजीआई भन्ने कम्पनीका एजेन्ट पनि रोक्ने लबिङमा छन् । अहिले टेन्डर गर्दा पहिले परामर्शदाताबाट प्राप्त दस्तावेजकै आधारमा टेन्डर गरिएको र यसबाट मूल्य तथा लागत न्यून अनुमान गरिएको भन्दै उनीहरूले लागत बढाउन लबिङ गरेको स्रोतको दावी छ ।

लागत बढाउने दौडधुपमा रहेका विचौलियाहरूको नजर एमडी नियुक्तिमा पनि परेको छ । उनीहरूले आफू अनुकूल एमडी ल्याउनका लागि तीब्र लबिङ बढाएका छन् ।  सरकार अल्पमतमा परे पनि एमडी नियुक्तिको प्रक्रिया भने तीब्र गतिमा अघि बढाएको भएपनि नयाँ सरकार गठन हुने भएपछि केही समयका लागि रोकिएको छ । अहिले नेपाल टेलिकममा एसिया इन्फोको बिलिङ प्रणाली रहेको छ।  यही बिलिङ प्रणालीकै कारण बर्सेनि अर्बौं आम्दानी चुहावट भइरहेको भन्दै आधुनिक र स्वचालित प्रणाली ल्याउनका लागि यसअघिका प्रबन्ध निर्देशक डिल्ली अधिकारीले खरिद प्रक्रिया नै अघि बढाएका थिए ।

तर अधिकारी बाहिरिएर सुनिल पौडेल प्रबन्ध निर्देशक हुनेबित्तिकै उक्त खरिद प्रक्रिया रोकिएको थियो । खरिद प्रक्रिया रोक्नेमात्र होइन, पौडेलले अझै चार वर्ष यही प्रणालीबाट काम चलाउने साँठगाँठ गरेका थिए ।  चिनियाँ कम्पनी एसिया इन्फो आफैंमा प्रतिष्ठित बिलिङ प्रणाली विकास तथा सञ्चालन गर्ने कम्पनी होइन । उद्योगमा खासै प्रतिष्ठा नकमाएको यो कम्पनीले नेपाल टेलिकमको बिलिङ प्रणाली पछिल्लो एक दशकदेखि सम्हालिरहेको छ । एसिया इन्फोलाई सुरुमै सेटिङमा छिराइएको थियो ।