अब उच्च जोखिमको सूचना जारी भएका दिन रात्रिकालीन सवारी चलाउन नदिइने, टिकट अनिवार्य

२८ असार, काठमाडौं । सरकारले उच्च जोखिम भएको समयमा राती सवारीसाधन चलाउन नदिने भएको छ । उच्च जोखिम भएका जिल्लाहरूमा रात्रिकालीन सवारी चलाउन नदिने भएको हो । सरकारी निकायले नै उच्च जोखिमबारे जानकारी दिने र सो समयभित्र तोकिएको क्षेत्रमा रात्रिकालीन सवारी चलाउन नदिने निर्णय गृह मन्त्रालयले गरेको हो । 

गृह मन्त्रालय अन्तर्गतको विपद् तथा द्वन्द्व व्यवस्थापन महाशाखामा बसेको बैठकले उक्त निर्णय गरको हो । जल तथा मौसम विज्ञान विभागबाट ‘रेड एड्भाइजरी’ जारी भएका जिल्ला र क्षेत्रहरूमा तत्तत् दिनमा रात्रिकालीन सवारी नचलाउने निर्णय भएको छ । यसको कार्यतालिका यातायात व्यवस्था विभाग र यातायात व्यवसायीहरूले मिलाउने गृह मन्त्रालयको विपद् तथा द्वन्द्व व्यवस्थापन महाशाखा प्रमुख डा. भीष्मकुमार भूसालले जानकारी दिए ।

यो निर्णयसँग बाढी–पहिरो आउनसक्ने सम्भावनाको सूचना जारी भएको राति सवारी चलाउन पाइने छैन । यसअघि सुरुमा गृहले बर्खायामभर रात्रिकालीन सवारी नचलाउने प्रस्ताव गरेको थियो । तर यातायात व्यवसायीले उक्त कुरा वैज्ञानिक नभएको बताए । त्यसैगरी अबदेखि लामो तथा मध्यम दूरीमा यात्रा गर्दा टिकट अनिवार्य गरिएको छ ।

पहिरो जाने तथा डुबान हुने सम्भावना देखिएका जोखिमयुक्त क्षेत्रमा सडक विभाग र ट्राफिक प्रहरीले जोखिमका संकेत चिह्नहरू राख्ने निर्णयसमेत भएको छ । त्यसैगरी यातायात व्यवसायी एवं यात्रु तथा चालकले सडक अवरुद्ध भएका स्थानहरूको जानकारी लिई त्यस स्थानमा पुग्नु अगावै सुरक्षित एवं खाद्यान्न, शौचालय लगायतको व्यवस्था भएका स्थानमा सवारी रोक्नुपर्ने निर्णय पनि गरिएको छ । 

भरतपुर महानगरपालिका–२९ सिमलतालमा आज बिहान करिब ३ बजे वीरगञ्जबाट काठमाडौंतर्फ आउँदै गरेको बागमती प्रदेश–०३–००६ ख १५१६ नम्बरको एन्जल डिलक्स बस र काठमाडौंबाट गौरतर्फ जाँदै गरेको बागमती प्रदेश–०३–००१ ख २४९५ नम्बरको बसलाई लेदोसहितको पहिरोले बगाएको थियो ।

अहिलेसम्म दुवै बसको अवस्था पत्ता लागेको छैन । बसमा कति यात्रु थिए भन्ने यकिन नभए पनि तीन जना पौडिएर निस्किएका छन् । गृहको विपद् तथा द्वन्द्व व्यवस्थापन महाशाखाका प्रमुख एवं सहसचिव डा. भीष्मकुमार भूसालका अनुसार बर्खा याममा राति सवारी साधन सञ्चालन गर्दा थप जोखिम हुने भएकोले गृहमन्त्रलायले रोक लगाउने प्रस्ताव अघि सारेएको थियो । 

मुग्लिन–नारायणगढ सडकखण्डमा रात्रिकालीन बस सञ्चालनमा रोक लगाएमा रातको समयमा गुड्ने ४ हजारभन्दा बढी सवारी साधन प्रभावित हुनेछन् । सडक डिभिजन, भरतपुरका अनुसार उक्त सडकखण्डमा दैनिक १२ हजारभन्दा बढी सवारी साधन गुड्छन् ।

‘यो बाटोको क्षमता भने दैनिक १५ हजारभन्दा माथि छ । रातको समयको त्यस्तो तथ्यांक राखेका छैनौं’, सडक डिभिजन, भरतपुर प्रमुख सीडीई रमेशप्रसाद पौडेल भन्छन्, ‘तर, रातको समयमा दैनिक ४ हजारभन्दा माथि गुड्छन् भन्ने अनुमान छ ।’