२० करोड ३७ लाख मूल्यपर्ने ५ किलो ८२० ग्राम कोकिन बरामद, ४७ वर्षीया महिला पक्राउ

३० असार, काठमाडौं । प्रहरीले २० करोड ३७ लाख मूल्य पर्ने, ५ किलो ८२० ग्राम कोकिनसहित मलेसियाकी ४७ वर्षीया एक महिलालाई पक्राउ गरेको छ । काठमाडौं महानगरपालिका वडा नम्बर २९ ठमेलस्थित सिटी होटलबाट मलेसियाकी ४७ वर्षीया महिला बथुम भादिभालोलाई पक्राउ गरेको जिल्ला प्रहरी परिसर काठमाडौंले जनाएको छ ।  

होटलमा लागुऔषधको कारोबार भइरहेको छ भन्ने विशेष सूचनाको आधारमा जिल्ला प्रहरी परिसर काठमाडौँ र प्रहरी वृत्त लैनचौरको संयुक्त टोलीले उनलाई पक्राउ गरेको हो । कोठाको खान तलासी गर्दा ६ वटा स्कुल ब्यागमा फल्स बटम बनाएर कोकिन लुकाएको भेटिएको थियो । बरामद भएको ५ किलो ८२० ग्राम  रहेको र यसको बजार मूल्य २० करोड ३६ लाख रुपैयाँ हुन आउने प्रहरीको भनाई छ ।

फल्सबटम हेर्दा कोकिन भेटिएको हो । प्रहरीका अनुसार उनी मलेसियाबाट लाओस र बैंकक हुँदै १३ जुलाई (शनिबार) काठमाडौं आइपुगेकी थिइन् । उनी १९ जुलाइमा नेपालबाट पुनः मलेसिया फर्किँदै थिइन । त्यसैबीच प्रहरीले आइतबार उनलाई पक्राउ गरेको हो । उनले लाओसबाट उक्त कोकिन लिएर काठमाडौं आएको र यहाँबाट अर्कै व्यक्तिलाई हस्तान्तरण गर्ने योजना थियो ।