सोमबार सुनको मूल्यमा नयाँ रेकर्ड, कति पर्छ एक तोलाको गहना बनाउन ?

३१ असार, काठमाडौँ । नेपाली बजारमा सुनको मूल्य आज पनि बढेको छ । सोमबार सुन तोलाको २ सयले बढेर एक लाख ४६ हजार ९ सयमा कारोबार भएको नेपाल सुनचाँदी व्यवसायी महासंघले जनाएको छ । यो सुनको अहिलेसम्मकै महंगो हो । आइतबार सुनको मूल्य तोलाको १ लाख ४६ हजार ७ सय रहेको थियो । 

गत शुक्रबार पनि यही मूल्यमा कारोबार भएको थियो । अन्तर्राष्ट्रिय बजारमा सुनको भाउ शुक्रबारको तुलनामा आइतबार र सोमबार बढेको छ । सोमबार तेजावी सुन प्रतितोला १ लाख ४६ हजार २ सयमा खरिदबिक्री भइरहेको नेपाल सुनचाँदी व्यवसायी महासंघले जनाएको छ । आज चाँदीको मूल्य पनि बढेको छ । चाँदी आज प्रतितोला १० रुपियाँ बढेर तोलाको १८८५ मा कारोबार भइरहेको महासंघले जनाएको छ ।

बढेको मूल्य अनुसार आज एक तोलाको गहना बनाउन कम्तीमा पनि १ लाख ६८ हजार ७ सय तिर्नुपर्नेछ । ज्याला, जर्ती, मुनाफा आदि जोडेर व्यवसायीले उपभोक्ता मूल्य जोडेका छन् । ज्याला र जर्तीका नाममा १२ देखि १८ प्रतिशत जोड्ने गरिएको नेपाल सुनचाँदी व्यवसायी महासंघको भनाइ छ । औसत १५ प्रतिशत ज्याला–जर्ती जोड्दा उपभोक्ता मूल्य १ लाख ६८ हजार ७ सय पर्न आउँछ । 

तोलामा मूल्य निर्धारण गरेपछि त्यसमा ज्याला–जर्ती कति राख्ने भन्ने नियम–कानुन छैन । यो व्यवसायीले आफूखुसी मूल्य राख्दै आएका छन् । ज्याला १२ प्रतिशतबाट घटाएर ७ प्रतिशतमा झारे पनि व्यवहारमा छैन् । ज्याला–जर्तीबाहेक मूल्य निर्धारणका क्रममा पनि मुनाफा राखिएको हुन्छ । 

नेपालमा अन्तर्राष्ट्रिय बजार र भारतको बजारलाई आधार मानेर मूल्य निर्धारण गरिन्छ । अन्तर्राष्ट्रिय बजारको हकमा ७५ र भारतीय बजारलाई २५ प्रतिशत आधार मानेर यहाँ मूल्य निर्धारण गर्ने चलन छ । अन्तर्राष्ट्रिय बजार मूल्य, डलरको विनिमय दर, २० प्रतिशत भन्सार दर र १ प्रतिशत मुनाफा गरी बजार मूल्य निर्धारण गरिन्छ । उक्त मूल्यमा थप ज्याला–जर्तीलगायत राखेर गहना बिक्री हुन्छ । यसले गर्दा उपभोक्ता मूल्य महँगो पर्ने गरेको हो ।