८ अर्ब ३५ करोड दावीसहित अख्तियारले दर्ता गर्यो २०१ वटा मुद्दा, कर्मचारी मात्र ५२४ जना प्रतिवादी

२ साउन, काठमाडौं । अख्तियार दुरुपयोग अनुसन्धान आयोगले गएको आर्थिक वर्षमा भ्रष्टाचार सम्बन्धी २०१ वटा मुद्दा दायर गरेको जनाएको छ । जसमा गैरकानुनी लाभहानीका ५८, घुसका ४८, नक्कली शैक्षिक प्रमाणपत्र ३४, सार्वजनिक सम्पत्तिको हानि नोक्सानी ३४ वटा मुद्दा रहेका छन् । त्यसैगरी राजश्व हिनामिना १३, गैरकानुनी सम्पत्ति आर्जन ११ र विविध ३ वटा मुद्दा रहेका छन् ।

अख्तियारले बुधबार जारी गरेको विज्ञप्ति अनुसार विशेष अदालतमा दायर २०१ मुद्दाका प्रतिवादीबाट ८ अर्ब ३५ करोड १२ लाख ९८ हजार १४२ रूपैयाँ ४६ पैसा बिगो माग दाबी गरिएको छ । आरोप पत्रमा प्रतिवादीको संख्या १ हजार ५२० जना रहेका छन् ।

जसमध्ये सरकारी कर्मचारी ५२४, निर्वाचित जनप्रतिनिधि १०१, मनोनीत पदाधिकारी १८१, लेखापढी व्यवसायी २, बिचौलिया २ र व्यवसायी ९१ जना रहेका छन् । त्यसबाहेक अन्य ६१९ जना छन् । आयोगका अनुसार सोही आर्थिक वर्षमा परेका जम्मा ३५ हजार ७९० उजुरीमध्ये  २७ हजार ३७५ उजुरी फर्छ्योट गरेको जनाएको छ

आर्थिक वर्ष २०८०।८१ मा अख्तियारले दायर गरेका मुद्दामा गैरकानुनी लाभहानी ५८ घुस (रिसवत) ४८, नक्कली शैक्षिक प्रमाण–पत्र ३४, सार्वजनिक सम्पत्तिको हानि नोक्सानी ३४, राजस्व चुहावट-हिनामिना १३, गैरकानुनी सम्पत्ति आर्जन ११ र विविध ३ वटा गरी २०१ वटा रहेका छन ।

उक्त आ.व. २०८०-८१ मा आयोगमा विभिन्न माध्यमबाट प्राप्त २६ हजार ५२२ तथा अघिल्लो आर्थिक वर्ष २०७९-८० बाट जिम्मेवारी सरेर आएका ९ हजार २६८ गरी कुल ३५ हजार ७९० उजुरीहरू रहेकोमा २७ हजार ३५७ उजुरी फर्छ्यौट गरिएका छन्, जुन कुल उजुरी संख्याको करिब ७६.४९ प्रतिशत हुन आउँछ ।

जसमा रंगेहात कारबाहीको संख्या– ३१ रहँदा ५२ लाख ४२ हजार ५०० रुपैयाँ नगद बरामद गरेको छ । रंगेहात कारबाहीमा ४४ जना पक्राउ परेका व्यक्तिमध्ये कुल राष्ट्रसेवक कर्मचारी ३२ रहेका छन्। त्यसैगरी, ९ जना लेखापढी व्यबसायी/बिचौलिया÷मतियार र ३ जना वडाध्यक्ष परेका छन् । विषेश अदालतबाट भएका फैसलाहरूमा चित्त नबुझी सर्वोच्च अदालतमा पुनरावेदन गरिएको संख्या ९२ रहेको अख्तियारको तथ्यांकमा उल्लेख छ ।

यस्तो छ आयोगको कार्य विवरण