बाराको कोल्हवीमा करोडौंको लागतमा एकीकृत भवन निर्माण हुँदै

♦ सञ्जय मिश्रा 

३ साउन, रौतहट । बाराको कोल्हवी नगरपालिका स्थित करोडौंको लागतमा कृषि तथा पशु सेवाको लागि एकीकृत भवन निर्माण सुरु भएको छ ।

कोल्हवी १ स्थित कृषि तथा पशु सेवाको लागि एकीकृत भवन निर्माणका लागि मेयर राम प्रसाद चौधरी र उप-मेयर लक्ष्मी कुमारी चौधरीले संयुक्त रुपमा विधिवत् पूजा पाठ गरि उक्त भवनको शिलान्यास गरेका छन ।

आर्थिक करिडोर कार्यालय (रिड) वर्दिवास,महोत्तरीको २ करोड ३९ लाख ४२ हजार ७७४ रुपैया २७ पैसाको आर्थिक सहयोगमा उक्त भवन सि.एम कन्स्ट्रक्सन जोरपाटी काठमाडौंले निर्माण गर्ने ठेक्का पाएको छ ।

करिडोरले आफ्नो तेस्रो चरणको भवन निर्माण अन्तर्गत उक्त भवन निर्माण गर्न लागेको पशु सेवा कार्यालय कोल्हविका प्रमुख शम्भु पनुहरले  जानकारी दिएका छन्।

ठेकदार कम्पनीले आगामी ७ महिना भित्र भवन निर्माणको काम पूरा गर्ने सम्झौता गरेको छ। भवन निर्माण पछि कृषि र पशुको एउटै भवनबाट सेवा प्रवाह हुने भएकाले किसान तथा पशु पालकहरुलाई  सहज हुने वडा १ का अध्यक्ष राजहरण चौधरीले खुसी व्यक्त गरेका छन् ।