ओलीलाई विश्वासको मत नदिने तीन दलको निर्णय, संविधान मिचेर प्रधानमन्त्री बनेको आरोप

४ साउन, काठमाडौं । तीन दलका नेताले प्रधानमन्त्री केपी शर्मा ओलीलाई विश्वासको मत नदिने निर्णय गरेका छन् । प्रधानमन्त्री ओलीले आइतबार प्रतिनिधि सभामा विश्वासको मत लिने कार्यसूची छ ।

नेकपा माओवादी केन्द्रका अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधवकुमार नेपाल र राष्ट्रिय स्वतन्त्र पार्टीका सभापति रवि लामिछानेको बैठकले उक्त निर्णय गरेको हो । बैठकपछि माओवादी केन्द्रका उपमहासचिव वर्षमान पुनले ओलीलाई विश्वासको मत नदिने निर्णय भएको जानकारी दिए । 

नयाँ सरकार ७६ (३) अनुसार गठन हुनुपर्नेमा ७६ (२) मा पुनः सरकार बन्नु असंवैधानिक हो भन्ने बैठकको निष्कर्ष छ । ठूला दल मिल्दा निरंकुशताको खतरा हुने भएकाले सशक्त प्रतिपक्ष बनेर लोकतान्त्रिक मूल्यमान्यता जोगाउन भूमिका खेल्ने सहमति भएको उनले बताए ।

नयाँ सरकार गठन गर्दा नेपाली कांग्रेस र नेकपा एमालेले नयाँ सरकार गठन हुँदा संविधान मिचिएको विपक्षी दलहरूकाे निष्कर्ष छ ।  संविधानको कमजोर जगमा उभिएर नयाँ सरकार गठन भएको उनीहरुको भनाइ छ । प्रधानमन्त्रीले विश्वासको मत नपाएपछि ७६ (३) अनुसार नयाँ सरकार गठन हुनुपर्नेमा त्यसो नगरी संविधान मिचेको बैठकको निष्कर्ष छ ।