ओलीप्रति माधव नेपालको कटाक्षः साथीलाई नर्क पुर्याएर आफू स्वर्गतिर लाग्नु भो, भोलि पछुताउनु नपरोस

६ साउन, काठमाडौं । नेकपा एकीकृत समाजवादीका अध्यक्ष माधवकुमार नेपालले प्रधानमन्त्री केपी शर्मा ओलीले विश्वासघाती राजनीति गरेको टिप्पणी गरेका छन् । माओवादी केन्द्रका अध्यक्ष पुष्पकमल दाहाल प्रचण्डसँग विगतमा ओलीले स्वर्ग गएपनि नर्क गएपनि सँगै जाने भनेर आश्वासन दिएपनि बिचबाटोबाटै छाडेर अर्को बाटो लागेको भन्दै नेपालले कटाक्ष गरेका हुन् । 

विश्वासको मत लिने प्रधानमन्त्री केपी शर्मा ओलीले प्रतिनिधि सभामा राखेको प्रस्तावमाथि भएको छलफलमा भाग लिँदै अध्यक्ष नेपालले शासन होइन, जनता बलियो बनाउनुपर्ने बताए । नेपालले राजनीतिक स्थायित्वको नाममा जनताले अर्को जंगबहादुर नखोजेको बताए ।

उनले नयाँ गठबन्धनको औचित्यलाई लिएर प्रश्न गरे । ओली र यसअघिका प्रधानमन्त्री प्रचण्डबीच स्वर्ग वा नर्क सँगै जाने भनेर दिएको वचनमाथि व्यंग्य हाने । गठबन्धन तुरुन्त तोडेर अर्को सहकार्य केका लागि जरुरी थियो ? त्यसमा पनि पाँच वर्ष सँगै जाने । स्वर्ग गए पनि नर्क गए पनि सँगै जाने । सुन्दै आनन्द लाग्ने कुरा । आफू स्वर्गतिर लाग्यो । अर्कोलाई लात्ति हिर्काएर नर्कतिर पुर्यायो । यसरी वचन दिएको सुन्नमा आएको छ । अचानक किन गठबन्धन फेरियो ?, उनले भने ।

उनले अघिल्लो साँझसम्म ओत लागेको गठबन्धन सरकार भोलिपल्टको मिर्मिरेअघि नै ढालेर स्थिरताको कुरा गरिएको बताए । नेपालले राजनीतिक स्थिरताका नाममा अर्को जंगबहादुर नखोजिएको पनि बताए । उनले शक्तिको केन्द्रीकरणबाट स्वेच्छाचारिता जन्मिने बताए । भोलि पछुताउनु नपरोस् । नेपाल जस्तो भूराजनीतिक संवेदनशीलता भएको बहुलता भएको देशमा निर्वाचित नै किन नहोस् । एउटा व्यक्तिगको स्वेच्छाचारी शासन सम्भव छैन, उनले भने ।