एमाले संसदीय दलका नेता काठमाडौं लागेपछि बागमतीमा फेरियो लामाले मुख्यमन्त्रीमा दाबी पेश गर्ने समय

७ साउन, हेटौंडा । बागमती प्रदेशको मुख्यमन्त्रीमा दावी पेश गर्ने समय लम्बिएको छ । अकस्मात एमाले संसदीय दलका नेता जगन्नाथ थपलिया काठमाडौं लागेपछि मुख्यमन्त्रीमा दाबी पेश गर्ने समय धकेलिएको छ ।आज कांग्रेसका बहादुरसिंह लामाले मुख्यमन्त्रीमा दावी पेश गर्ने तयारी गरेका थिए । 

बागमती प्रदेशमा कांग्रेस र एमालेबीच मन्त्रालयको भागबण्डा पनि मिलिसकेको छैन् । कांग्रेस संसदीय दल नेता बहादुर सिंह लामाले आज १० बजे प्रदेश प्रमुख कार्यालयमा दाबी पेश गर्ने समय लम्बिएको कांग्रेसले जनाएको छ । थपलियाले आफूलाई पार्टीका नेताहरुले बोलाएकाले काठमाडौं जानुपर्ने जानकारी गराएपछि दाबी पेश रोकिएको कांग्रेस संसदीय दलका नेता लामाले जानकारी दिए ।

नेकपा माओवादी केन्द्रका शालिकराम जम्कट्टेलले मुख्यमन्त्री पदबाट आइतबार राजीनामा दिएपछि प्रदेश प्रमुख यादव चन्द्र शर्माले ८ साउन ५ बजेभित्र संविधानको धारा १६८ (२) अनुसार बहुमतको सरकार गठनका लागि आह्वान गरेका थिए । अब भ्याए आजै बेलुकासम्म नभ्याए भोलि बिहान दाबी पेश गर्ने कुरा भएको लामाले जानकारी दिए ।