निर्वाचन आयुक्तमा प्रस्तावित प्रधानको सिफारिस अनुमोदन नहुने संकेत, आज समितिले गरेन निर्णय

९ साउन, काठमाडौं । निर्वाचन आयुक्तमा प्रस्तावित कृष्णमान प्रधानको बुधबारको संसदीय सुनुवाइ सकिएको छ । उनले सुरुमा आफ्नो कार्ययोजना प्रस्तुत गरेपछि सुरु भएको प्रश्नोत्तरका क्रममा सांसदहरूले यौन शोषणको आरोप लागेकाले प्रधानमा उच्च नैतिक चरित्र नदेखिएको बताएका छन् । 

जागिर लगाइदिने प्रलोभनमा पारेर निरन्तर यौन दुर्व्यवहार गरेको भन्दै प्रधानमाथि उजुरी परेको थियो । सुनुवाइ समितिमा अधिकांश सांसदहरूले यही उजुरी केन्द्रित प्रश्न प्रधानलाई सोधेका थिए । तर प्रधानले सांसदहरूले सोधेका प्रश्न टार्न खोजिरहे । सांसद ईश्वरी घर्तीले प्रधानमाथि परेको यौन दुर्व्यवहार आरोपबारे प्रश्न सोधेकी थिइन् । मिलापत्र गर्न पैसा दिएको विषय के हो भन्ने उनको प्रश्न थियो ।

सांसद जीवन परियारले निर्वाचन आयोगको आयुक्त हुनका लागि उच्च नैतिक चरित्र भएको मानिस हुनुपर्ने भएकोले प्रधानमाथिका आरोपले उच्च नैतिक चरित्र नदेखिएकोमा के प्रतिक्रिया छ भनेका थिए । सांसद ईश्वरीदेवी न्यौपानेले यौन दुर्व्यवहार, शारीरिक हिंसा र त्यसमा पैसाको लेनदेन भएको उजुरीबारे जबाफ मागेकी थिइन् ।

सांसद महेश बर्तौलाले प्रधानलाई आफूविरुद्द लागेको आरोपको कसरी बचाउ गर्नुहुन्छ भनेर प्रश्न गरेका थिए । गम्भीर प्रश्न समाजमा छन् । तीन चार वटा उजुरी एउटै खालको छ । तपाईंलाई (प्रस्तावित पदमा) अयोग्य ठानेमा कसरी आफ्नो बचाउ गर्नुहुन्छ ? । सांसद प्रकाश अधिकारीले पनि प्रधानलाई आफूविरुद्ध लागेको उजुरीबारे स्पष्ट पार्न आग्रह गरेका थिए । 

सांसद डोलप्रसाद अर्याल (डीपी) ले प्रधानको सम्पत्तिमाथि नै प्रश्न उठाए । एक करोड २५ लाख रुपैयाँ दिन सक्ने भनेपछि त तपाईंको आयस्रोतमाथि नै अनुसन्धान गर्नुपर्ने देखिन्छ, यसमा के भन्नुहुन्छ ?।

सांसदहरूले सोधेका प्रश्नलाई प्रधानले अस्वीकार भने गरेनन्। उनले यो विषय मिलापत्र भई अदालत बाटै टुंगिएको बताएका थिए । यौन दुर्व्यवहारसम्बन्धी आफूमाथि लागेका आरोपको अस्वीकार नगरेका उनले आयस्रोत बारेको प्रश्नमा पनि जबाफ दिएनन् । सुनुवाइ समितिले प्रधानलाई गरिएको सिफारिसमा बुधबार कुनै निर्णय लिएन । सांसदहरूका अनुसार यसबारे अर्को बैठकमा निर्णय हुनेछ । तर अर्को बैठक कहिले बस्ने मिति तोकिएको छैन । सांसदहरूले प्रधानलाई अनुमोदन गर्न नसकिने संकेत गरेका छन् ।