तोकिएको बैंक खातामा विप्रेषण पठाउने सर्तमा विदेश जान श्रम स्वीकृति लिएकालाई बिनाधितो ऋण दिइने

११ साउन, काठमाडौं । नेपाल राष्ट्र बैंकले वैदेशिक रोजगारीमा जान चाहने व्यक्तिलाई बिनाधितो ऋण उपलब्ध गराउने भएको छ । यसमा तोकिएको बैंक खातामा नै विप्रेषण पठाउनुपर्ने सर्त राखिएको छ । राष्ट्र बैंकले शुक्रबार सार्वजनिक गरेको आर्थिक वर्ष २०८१/०८२ को मौद्रिक नीतिमार्फत यस्तो व्यवस्था गरेको हो । 

चालु आर्थिक वर्षको बजेट वक्तव्यमा उल्लेख भएअनुसार यस्तो व्यवस्था गरिने राष्ट्र बैंकले जनाएको हो । यसका लागि विदेश जानेले बैंक खातामा विप्रेषष पठाउने सुनिश्चितता गर्नुपर्नेछ । बजेट वक्तव्यमा उल्लेख भएअनुसार वैदेशिक रोजगारीमा जान श्रम स्वीकृति लिएका व्यक्तिलाई बैंक खातामा विप्रेषण पठाउने सुनिश्चितताका आधारमा बिनाधितो ऋण उपलब्ध गराउने व्यवस्था गरिने भएको हो । 

यसैगरी बजेट वक्तव्यमा उल्लेखित कृषि उपजको धितोमा समेत सहज रुपमा कर्जा प्रवाह हुने व्यवस्था मिलाइने भएको छ । राष्ट्र बैंकले बजेट वक्तव्यमा उल्लेख भएको बैंक तथा वित्तीय संस्थाबाट प्रवाह हुने कर्जालाई नवप्रवर्तनमा प्रवाह गर्न प्रोत्साहन गर्ने भएको छ ।

मौद्रिक नीतिका खास व्यवस्था:

(१) लघुवित्त मर्जरलाई प्रोत्साहन: सेवाशुल्क पुनरवलोकन हुने, कर्जा पुनर्तालिकीकरण गरिने

(२) असल कर्जामा गर्नुपर्ने विद्यमान १.२० प्रतिशत कर्जा नोक्सानी व्यवस्था घट्यो, १.१० प्रतिशत कायम

(३) महँगी वृद्धिदर ५ प्रतिशतमा सीमित राख्ने

(४) चेक बाउन्सलाई आधार मानेर कालोसूचीमा राख्ने व्यवस्था परिवर्तन गरिने

(५) घट्यो  बैंकदर र नीतिगत दर, निक्षेप संकलन दर ३ प्रतिशतमै यथावत्

(६) व्यवसायको लागि विदेशी सटही सुविधा बढ्यो, ५० हजार डलर कायम

(७) सेयर धितो कर्जाको २० करोडको सीमा खारेज

(८) निर्माण व्यवसायीले मंसिरसम्म कर्जा तिर्ने गरी पुनर्तालिकीकरण हुने