सरकारलाई दिएको समर्थन कायमै राखेर कोशीमा माओवादीका मन्त्रीले दिए राजीनामा

११ साउन, विराटनगर । नेकपा माओवादी केन्द्रले कोशी प्रदेश सरकारलाई दिएको समर्थन कायमै राखेर मन्त्री फिर्ता बोलाएको छ । माओवादी संसदीय दलका नेता इन्द्रबहादुर आङ्बोले मुख्यमन्त्री हिक्मतकुमार कार्कीकै आग्रहमा समर्थन कायम राखेर मन्त्रीलाई राजीनामा दिन लगाएको बताए । शुक्रबार सरकारमा सहभागी मन्त्रीले राजीनामा दिएका हुन् । 

प्रदेश सरकारमा माओवादी केन्द्रबाट तीन जना मन्त्री र एक राज्यमन्त्री थिए । १७ असारमा केन्द्रमा सत्ता समीकरण परिवर्तन भएपनि प्रदेश सरकारबाट माओवादी केन्द्र बाहिरिएको थिएन । मुख्यमन्त्री हिक्मतकुमार कार्कीले आफूलाई अप्ठ्यारो भएको बताएपछि माओवादी मन्त्रीले राजीनामा बुझाएका हुन् ।

माओवादीबाट प्रदेशमा गणेश उप्रेती भौतिक पूर्वाधार, राजेन्द्र कार्की स्वास्थ्य, नारायण बुर्जामगर पर्यटन वन तथा वातावरण मन्त्री र बन्दना झागड वन पर्यटन तथा वातावरण राज्यमन्त्री थिइन् । आङ्बोले माओवादीले बनाएको मुख्यमन्त्री हिक्मतकुमार कार्कीले चाहेसम्म सरकारमा बसेको बताए । उनले सरकार छाड्नुअघि पत्रकार सम्मेलन गर्दै मुख्यमन्त्रीले सहमतिको सरकार बनाउन नसकेका कारण राजीनामा दिएको बताए ।