त्रिशुलीमा हराएका बस खोज्ने कि नखोज्ने भन्ने विषयमा आज सुरक्षा समितिले निर्णय गर्ने

१३ साउन, काठमाडौं । त्रिशुलीमा हराएका दुई बस खोज्ने क्रममा निराशा मात्र भेटिएको छ । थप खोजी कार्य अघि बढाउने कि रोक्ने भन्ने विषयमा छलफल गर्न जिल्ला सुरक्षा समितिको बैठक बस्न लागेको छ ।  सिमल ताल पहिरोमा बगेका बस र यात्रुको खोज्न आएको भारतीय प्राविधिक टोली पनि आइतबार आज फर्कने तयारीमा छ । भारतीय प्राविधिकहरूलाई आइतबार बिदाइ गरिने चितवनका प्रमुख जिल्ला अधिकारी इन्द्रदेव यादवले जानकारी गराएका छन् । 

यस विषयमा छलफल गर्न जिल्ला सुरक्षा समितिको बैठक बस्दैछ । हालसम्म शव फेला परी सनाखत भएका र शव पनि फेला पर्न नसकेका बेपत्तालाई सरकारको निर्णय बमोजिम मृतक मानेर राहत प्रक्रिया सुरु गर्नेबारे छलफल हुनेछ । खोजीमा प्रयोग गरेको १९ किलोको चुम्बक पनि त्रिशूलीमै हराएको छ । खोजी कार्य गर्ने वा नगर्ने वा नेपाली टोलीले मात्र खोजी गर्ने भन्नेबारे समितिका निर्णय हुने प्रमुख जिल्ला अधिकारी यादवले बताए । 

भारतको राष्ट्रिय आपदमोचन बलका प्राविधिकहरू प्रविधिसहित एक हप्ताका लागि खोजीमा सघाउन नेपाल आएका थिए । पहिरोमा परेर त्रिशूलीमा बेपत्ता दुई वटा बस शनिबार १५ औं दिनमा पनि नभेटिएपछि  खोजीका लागि अन्यौलता बढेको हो । 

गोताखोर र सोनार क्यामेरासहित खोजीमा संलग्न भारतीय टोलीले शनिबार १४ किलो र १९ किलोका दुई वटा चुम्बक प्रयोग गरेका थिए । तीमध्ये १९ किलोको चुम्बक पानीको बेगले त्रिशूलीमै हराएको छ । चार गोताखोरसहित आएका १२ जना प्राविधिकहरूले अघिल्लो आइतबारदेखि खोजी सुरु गरेका थिए ।  उपलब्धी हात नपरेपछि भारतीय टोलीले हालसम्म गरेको कामको समीक्षा गरेर धन्यवादसहित फिर्ता पठाइने यादवले जानकारी दिए । 

असार २८ गते शुक्रबार बिहान साढे तीन बजेतिर काठमाडौंबाट गौर आउँदै गरेको प्रदेश ०३–००१ ख २४९५ नम्बरको गणपति यातायातको बस र बीरगञ्जबाट काठमाडौं जाँदै गरेको बागमती प्रदेश ०३–००६ ख १५१६ नम्बरको एञ्जल नामको यात्रु बस नारायणगढदेखि करिब २३ किलो मिटरपूर्व उत्तर सिमलताल सिँदुरेगैरामा झरेको लेदोसहितको पहिरोमा बग्दै त्रिशूलीमा खसेर बेपत्ता भएका छन् । चितवन जिल्ला प्रशासनका अनुसार दुवै बसमा ६५ जना यात्रु थिए ।