ओली प्रधानमन्त्री रहेसम्म कोशीको मुख्यमन्त्री नफेरिने, कांग्रेसलाई ४ मन्त्रालय

१३ साउन, विराटनगर । कोशी प्रदेशमा सत्ता भागबण्डाको विषयमा कांग्रेस र एमालेबीच सहमति भएको छ । उनीहरुले केन्द्र अनुसार नै संघमा पनि नेतृत्व परिवर्तन गर्ने सहमति गरेका छन् । केन्द्रमा एमाले अध्यक्ष केपी शर्मा ओलीपछि कांग्रेस सभापति शेरबहादुर देउवा प्रधानमन्त्री बन्ने सहमति छ । 

सत्ता साझेदार दल एमाले र कांग्रेसबीच भएको सहमति अनुसार कांग्रेसले ४ मन्त्री र एक राज्यमन्त्री लिने र एमालेले मुख्यमन्त्रीसहित ५ मन्त्रालय लिने सहमति भएको नेताहरूले बताएका छन् । काठमाडौँमै भएको बैठकले केन्द्रमा ओली प्रधानमन्त्री रहुञ्जेल कोशीमा वर्तमान मुख्यमन्त्री हिक्मतबहादुर कार्की नै मुख्यमन्त्री रहने र शेरबहादुर देउवा प्रधानमन्त्री बनेपछि कोशीमा कांग्रेसले सरकारको नेतृत्व गर्ने सहमति भएको छ ।

त्यस्तै बैठकले मुख्यमन्त्री र मन्त्रीका अलावा प्रदेश सभामा रहने संसदीय समितिमा पनि बराबर भागबन्डा गर्ने सहमति गरेको छ । ७ वटा संसदीय समितिमध्ये २ दलले ३-३ वटा लिने र सार्वजनिक लेखा समिति प्रतिपक्षीलाई दिने सहमति भएको छ । सहमति अनुसार अब छिट्टै काँग्रेस सरकारमा जाने भएको छ ।