जेल भोगेर पनि नसुध्रिएका लुटेरा नाइके धनबहादुर !

१४ साउन, काठमाडौं । समाजमा सामान्य लुटपाटका घटनालाई सामान्य रुपले नै हेर्ने गरिन्छ । नेपाल प्रहरीले पनि परिस्थितिजन्य अपराधमा लागेकाहरूलाई सुधारिने मौका दिन्छ । उसबाट फेरी अपराधका घटनाहरू नदोहोरिउन भन्ने सामाजिक न्यायको सिद्धान्त अनुसार दीक्षित भएका केही सुधारिन्छ पनि । तर, केहीले परिस्थितिजन्य भएको अपराधलाई पछि गएर पेशा नै बनाउँछन् । यस्तै लुटेराका नाइके हुन धनबहादुर स्याङतान पनि  । 

अरूलाई लुटेर आफ्नो जीविकोपार्जन चलाउने गिरोह मध्ये उनी एक सक्रिय लुटेरा हुन् । यही साउन १२ गते प्रहरीले नागार्जुन नगरपालिका स्थित स्युचाटारबाट एक जना लुटेरालाई पक्राउ गर्यो । लुटपाटपछि सुरक्षित स्थानसम्म पुग्ने क्रममा उनी प्रहरीको हात परे । धनबहादुर स्याङतानका नामले चिनिने उनी उपत्यका र आसपासका क्षेत्रमा ठूलो रकम र गरगहना लुटपाट गर्ने समूहका नाइके भएको प्रहरी बताउँछ । स्याङतान यसअघि यस्तै लुटपाटको घटनामा समातिएर लामो समय जेल बसको थिए ।  । 

११ वर्ष जेल बसेर निस्किएको केही समयमै उनी पुरानै पेशामा फर्किए । अरूलाई हतियार देखाएर धम्क्याउने र भएको नगद तथा जिन्सी लिएर सुरक्षित स्थानतर्फ लाग्नु उनको दैनिकी नै थियो । जिल्ला प्रहरी परिसर काठमाडौंका प्रवक्ता प्रहरी उपरीक्षक नवराज अधिकारीले बताए अनुसार स्याङ्तानको सही पृष्ठभूमि बुझ्न प्रहरी अहिले अनुसन्धानमै छ । पछिल्लो समय एक हाइकिङ टोलीलाई लुटपाट गरेपछि उनी समातिएका हुन् । उनको चोरी र डकैतीको इतिहास लामै छ । 

अधिकारीका अनुसार २०६९ जेठ २८ मा लुटपाट र जबर्जस्ती करणी मुद्दामा उनीमाथि सजाय सुनाइएको थियो । तोकिएको सजाय अनुसार ११ वर्ष ६ महिना २४ दिन जेल बसेर गत वर्ष माघ ११ गते उनी जेलमुक्त भएका थिए । जेल सजाय काटेर आएपछि उनी सुधारिएको अपेक्षा गरिएको थियो । तर, यसपछि पनि उनी पुरानै काममा लाग्न थाले । अहिले उनी माथिको अनुसन्धान जारी नै छ । 

२०८० चैत १२ गते काठमाडौंको चन्द्रागिरि नगरपालिका चाखेल देउरालीमा इन्द्रकुमारी लामाले सञ्चालन गरेको टहरामा समेत लुटपाट भएको घटनामा पनि स्याङतानकै समूह रहेको प्रहरी बताउँछ । काठमाडौंका प्रवक्ता अधिकारीका अनुसार असार पटक पटक बुढानीलकण्ठमा भएको लुटपाटमा पनि उनकै संलग्नता देखिएको छ । 

असार २८ गते राति नौ बजे बूढानीलकण्ठ नगरपालिका– ३ स्थित तारे भीरतर्फ जाने क्रममा गिरिजा शान्ति पार्कमा दुई जनालाई खुकुरी देखाएर दुई थान मोबाइल उनले लुटपाट गरेका थिए । उनले पीडित महिलालाई जबर्जस्ती करणीको प्रयास समेत गरेका थिए । लगत्ते असार २९ गते बिहान साढे १० बजे बूढानीलकण्ठ स्थित बागद्वारतर्फ हाइकिङ जाने क्रममा दीपक शर्मा पोख्ररेललगायत ६ जना व्यक्तिलाई खुकुरी देखाएर ६ वटा मोबाइल र दुई वटा घडी लुटपाट गरेको घटनामा पनि स्याङ्तानकै संलग्नता खुलेको अधिकारीले बताए । 

असार २९ मै सोही पार्क जाने क्रममा प्रवीण शेर्माबाट स्याङ्तानको समूहले दुई वटा मोबाइल, सुनको औँठी र सिक्री लुटपाट गरेको प्रहरीले जनाएको छ । हाइकिङ टोली लुटिएको घटनामा उनलाई समाउन प्रहरीले  निकै प्रयास गर्नु परेको थियो । उनीसँगै लुटपाटमा संलग्न अन्य ३ जनाको खोजी भइरहेको प्रहरीको भनाइ छ । उनी मकवानपुरगढी गाउँपालिका– १ फूलबारीका हुन् । स्याङ्तानले विगतको आपराधिक पृष्ठभूमिलाई अहिले पनि निरन्तरता दिएको प्रहरीको भनाइ छ । 

उनी साउन १२ गते नागार्जुन नगरपालिका स्थित स्युचाटारबाट पक्राउ पर्नुअघि उनले हाइकिङमा गएका ६ जना सर्वसाधारणलाई खुकुरी देखाएर लुटपाट गरेका थिए । छिमेकी अमिर लामा, भाञ्जा प्रविन शाही र छोरा सुरज स्याङ्तानलाई समेत साथमा लिएर उनले लुटपाट धन्दालाई निरन्तरता दिएको खुलेको छ । नागार्जुनको विन्दावासिनी जंगलमा खुकुरी देखाएर स्याङ्तानको समूहले ७ तोला ६४ ताल बराबरको सुनको गरगहना, चाँदीको ब्रासलेट र १३ हजार ४ सय लुटपाट गरेर भाग्दै गर्दा प्रहरीले छेकारो हानेर स्याङ्तानलाई पक्राउ गरेको थियो । 

त्यतिबेला लामा र उनका छोरा नव बुद्ध लोलाई खुकुरी प्रहार गरी घाइते बनाएर टहराबाट १ लाख सात हजार सुनका गरगहना समेत लुटी स्याङ्तानको समूह भागेको थियो । घटनास्थलमा स्याङ्तानले नोकिया मोबाइल छाडेर भागेका थिए । प्रहरीले सीमकार्ड दर्ता अभिलेख हेर्दा उनकी श्रीमतीको नाममा दर्ता रहेको खुलेको अधिकारीले बताए । फर्पिङमा समेत गत असारमा स्याङ्तानले लुटपाट गरेको रहस्य खुलेको छ । बिहानै हाइकिङमा हिँडेका ७ जना सर्वसाधारणलाई खुकुरी देखाएर उनीहरूको साथमा रहेको ८ वटा मोबाइल लुटेर भागेको प्रहरी अनुसन्धानबाट खुलेको छ ।

ललितपुरका खोकनामा सञ्चालित एक बालगृहमा खुकुरी र पेस्तोल देखाएर दुई लाख ७६ हजार लुटपाट गरी पीडित महिलालाई जबर्जस्ती करणी गरेको आरोपमा उनी नख्खु कारागार चलान भएका थिए । पछिल्लो समयमा पनि लुटिएको मोबाइलमध्ये एउटा स्याङ्तानकै साथबाट फेला परेपछि उनले नै लुटपाट गरेको तथ्य प्रमाणित भएको हो । उनले यसपछि लुट्नका लागि बनाएको योजनाबारे पनि प्रहरीले अनुसन्धान गरिरहेको छ ।