राजदूतको अपेक्षा राखेका वैरागीले सुरक्षा सल्लाहकारबाट दिए राजीनामा

१६ साउन, काठमाडौं । राष्ट्रिय सुरक्षा सल्लाहकार शंकरदास वैरागीले राजीनामा दिएका छन् । प्रधानमन्त्री केपी शर्मा ओलीले राष्ट्रिय सुरक्षा सल्लाहकार पद कायम राख्न नचाहेकाले उनले राजीनामा दिएका हुन् । वैरागीलाई कुनै देशको राजदूतको बनाउने आश्वासन दिएको बताइएको छ । 

वैरागीलाई भारतका लागि नेपालको राजदूत बनाउने आश्वासन यसअघि दिएको भएपनि अहिले भने डा शंकर शर्मा नै कायम रहने भएका छन् । वैरागीले ९ साउनमै राजीनामा दिएको प्रधानमन्त्रीको सचिवालयले बताएको छ । पूर्व मुख्यसचिव वैरागी ३२ जेठ २०८० मा राष्ट्रिय सुरक्षा सल्लाहकार बनेका थिए । 

वैरागीले मुख्यसचिवको कार्यकाल केही महिना बाँकी छँदा बैकुण्ठ अर्याललाई मुख्यसचिव बनाउने बाटो खोल्दै राजीनामा दिएका थिए । मुख्य सचिवमा अर्याल र राष्ट्रिय सुरक्षा सल्लाहकारमा वैरागीको नियुक्त एकै दिन भएको थियो । तर उनलाई भारतका लागि राजदूत बनाउन प्रधानमन्त्री ओली तयार नभएर रोकिएका थिए ।