जनतामा जानु अघि माओवादीका अध्यक्ष प्रचण्डलाई पूर्वप्रदेश प्रमुख राजेश अहिराजका ८ प्रश्न ?

१७ साउन, काठमाडौं । नेकपा माओवादीका अध्यक्ष पुष्पकमल दाहाल प्रचण्डलाई दश वर्ष लामो सशस्त्र विद्रोह र त्यसपछि सरकारमा बसेको समयमा गरेका कामको विवरण सार्वजनिक गर्न माग गर्दै पूर्व प्रदेश प्रमुख राजेश  अहिराजले ८ प्रश्न सोधेका छन् । उनले अब जनतामा जानुअघि जनतासमक्ष सार्वजनिक गर्नुपर्ने विषय उठान गरेका छन् । आफूले गरेका काम जानकारी गराएर मात्र जनतामा जानुपर्ने उनको सुझाव छ । 

अहिराजले प्रचण्डलाई सशस्त्र युद्धको आवश्यकता र औचित्य पुष्टिगर्न भनेका छन् । सशस्त्र युद्धका समयमा जनताबाट लुटिएको सम्पति कहाँ छ भनेर प्रश्न गरेका छन् । सरकारमा रहँदा जनताको नामबाट कर उठाएर अनधिकृत रुपले कमाएको सम्पति देश र विदेशका कुन कुन बैंकमा राखिएको छ त्यसको पनि जनतामा जुनअघि विवरण दिनुपर्ने माग गरेका छन् । 

आफूले प्रत्यक्ष भेटेर माग राख्ने समय नपाएको भन्दै उनले फेसबुकमार्फत माग राखेका छन् । माओवादी अध्यक्ष प्रचण्डले सरकारबाट विदा भएपछि जनतालाई बुझाउन गाउँ जाने बताएका थिए । अहिराजले प्रचण्ड जनता भेट्न गाउँ जानुअघि सबै प्रश्नको उत्तर दिनुपर्ने बताएका छन् । आफ्ना आफन्त र परिवारका सदस्यहरूलाई राजनीतिमा नियुक्त दिनुको कारण र उनीहरुले यसबाट कमाएको सम्पती पनि जनतामा सार्वजनिक हुनुपर्ने माग राखेका छन् । 

यस्ता छन अहरिाजले प्रचण्डसामू राखेका मागः    
  
प्रचण्डजीलाई भेटेरै सल्लाह दिने मन थियो । देशी च्यानलले समय मिलाउन सकेन र विदेशी च्यानलसम्म मेरो पहुच भएन । भेट हुन सकेन् । तै पनि उहाँलाइ समाजिक सञ्जालबाटै आग्रह गरे । जनतामा जानुअघि प्रचण्डजीलाई नमागेको सुझाव । 

(१) तपाइले कुनकुन बिदेशीसँग कुन कुन हतियार र कति पैसा मागेर आफ्नै देशको नागरिक नरसंहारको अभियान थाल्नु भो ? देश र जनतालाई प्रस्ट हुने गरी बेलैमा बताइदिनुस ।

(२) तपाइको अगुवाइमा लुटिएको धन, हतियार  र अन्य सम्पत्ति अहिले कहाँ र कस कस्को जिम्मामा छ । माओवादी नेता कार्यकर्ता र आफन्तको नाममा विदेशतिर कुन कुन बैकमा कति कति पैसा छ ? सार्वजनिक गर्नुस ।

(३) तपाइले आफ्नो परिवारलाई दिनुभएको राजनीतिक नियुक्तिको सूची बनाउने र सबैलाई फिर्ता बोलाउने ।

(४) कुन कुन विदेशीलाई कस्को कस्तो पत्र, सम्झौता र बाचा गर्नु भएको छ । सरकारमा हुँदा गरिएको पत्राचार समेत ।

(५) आफू र आफ्नो  परिवारको सदस्यहरूको नाममा रहेको सबै सम्पत्ति (पैत्रिकबाहेक) लाई राष्ट्रीयकरण गर्नुस ।

(६) माओवादी आन्दोलनको आडमा अपराध गर्ने, जनतासँग हिंसा गर्ने, विदेशी दलाली गर्ने, धनमाल लुट्ने अन्य नेता/ कार्यकर्ताको नाम र कामहरू सार्वजनिक गर्नुस ।

(७) अब उप्रान्त आफू कुनै सरकारी पदमा नजाने र जनताको अहितमा केही नगर्ने र कसैलाइ गर्न नदिने ।

(८) बिदेशीको लहलहैमा लागेर आफूले देश र जनता विरुद्ध गरेका र बाध्य भएर गर्नु परेका सम्पूर्ण दुष्कर्मबारे जनतालाई बताउँदै माफी माग्ने । अनि बल्ल जनतामा गएको ठिक होला । तपाइको अगामी दिन शुभ रहोस र देशको पक्षमा रहोस ।