सरकार कामचलाउ भएपछि प्रचण्डले अनधिकृत रुपमा बाँडे १ करोड २३ लाख रकम

१७ साउन, काठमाडौं । नेकपा माओवादीका अध्यक्ष एवं निवर्तमान प्रधानमन्त्री पुष्पकमल दाहाल प्रचण्डले  कामचलाउन हैसियतमा पुगेपछि आर्थिक सहायताका नाममा १ करोड २३ लाख ५४ हजार ३७७ रकम वितरण गरेको पाइएको छ । अर्थ मन्त्रालयले बिहीबार सार्वजनिक गरेको विवरणअनुसार उक्त रकम उनले २०८१ असार महिनामा वितरण गरेका थिए । 

प्रचण्ड नेतृत्व सरकारले विश्वासको मत नपाएपछि सरकार ढलेको थियो । त्यसपछि गत असार ३१ गते नेकपा एमालेका अध्यक्ष केपी शर्मा ओली नेतृत्वमा नयाँ सरकार गठन भएको थियो । नेकपा एमाले र नेपाली कांग्रेसबीच असार १७ गते नयाँ गठबन्धन बनेपछि असार १९ गते एमालेका मन्त्रीहरूले सामूहिक राजीनामा दिएका थिए । त्यसपछि प्रचण्डले गत असार २८ गते प्रतिनिधिसभामा विश्वासको मत लिएका थिए तर, उनले पाएनन् । 

अर्थ मन्त्रालयका अनुसार प्रचण्ड नेतृत्वको सरकारले आर्थिक वर्ष २०८०÷०८१ को (२०८० साउनदेखि २०८१ जेठसम्म) पहिलो ११ महिनामा आर्थिक सहायताका नाममा  दुई करोड ५१ लाख ९५ हजार ९३५ रुपैयाँ वितरण गरेका थिए । तर, सरकारबाट हट्ने भएपछि गत असारमा मात्र प्रचण्ड नेतृत्वको सरकारले एक करोड २३ लाख ५४ हजार ३७७ रुपैयाँ आर्थिक सहायताको नाममा वितरण गरेका थिए ।