विश्वासको मत नमागी सुदूरपश्चिमका मुख्यमन्त्री सोडारीले दिए पदबाट राजीनामा

१८ साउन, धनगढी । विश्वासको मत नपाउने अवस्थामा आइपुगेका सुदूरपश्चिमका मुख्यमन्त्री दीर्घबहादुर सोडारीले राजीनामा दिएका छन् । शुक्रबार प्रदेश सभामा सम्बोधन गर्दै उनले पदबाट राजीनामा दिएको घोषणा गरेका छन् । उनले आफूलाई मुख्यमन्त्री नियुक्त गर्न सहयोग गर्ने सबैलाई धन्यवाद पनि दिए ।

मुख्यमन्त्री सोडारीको अनुरोधमा विश्वासको मत लिने प्रयोजनका लागि प्रदेश सभा सचिवालयले प्रदेश सभा बैठकको कार्यसूची निर्धारण गरेको थियो । तर सोडारीले मन्तव्यका क्रममा विश्वासको मत विभाजनमा जानु पूर्व नै मार्ग प्रशस्त गर्न राजीनामा दिएको घोषणा गरे ।

नेकपा एमाले, माओवादी, नागरिक उन्मुक्ति पार्टी (रंजिता श्रेष्ठ समूह) र एक जना स्वतन्त्र सांसदको समर्थनमा वैशाख ६ गते मुख्यमन्त्री नियुक्त भएका एकीकृत समाजवादी संसदीय दलका नेता सोडारीले करिब एक सय दिन सरकारमा बस्दा निकै उतारचढावको सामना गरे ।