बंगलादेशको घटनाले नेपालमा सुरक्षा सतर्कता बढाइयो, सीमा नाकामा कडाइ

२१ साउन, काठमाडौं । बंगलादेशमा भएको पछिल्लो राजनीतिक घट्नाको नेपालमा पर्न सक्ने प्रभावबारे केन्द्रीय सुरक्षा समिति बैठकमा छलफल भएको छ । आन्दोलन चर्किएर प्रधानमन्त्री शेख हसिनाले देश छाडेको घटनाबारे छलफल गर्न सोमबार साँझ गृह मन्त्रालयमा बसेको समितिको बैठकमा बंगलादेशको आन्दोलनको असर नेपालमा पनि पर्नसक्ने आकलन गर्दै सीमा नाकामा कडाइ गर्ने र सुरक्षा सतर्कता बढाउने बारे छलफल भएको एक उच्च अधिकृतले बताए ।  

योसँगै कोशी प्रदेशका झापा, मोरङ र सुनसरीका सीमा नाकामा कडाइ गरिएको छ भने अन्य नाकामा पनि शंकास्पदहरुको निगरानी गर्न सर्कुलर गरिएको छ ।  प्रदर्शनमा लक्षित समूह, भारतमा बस्ने बंगालीहरु र रोहिंगाहरु भारतको बाटो हुँदै  नेपालमा आउने सक्ने भएकाले सुरक्षा सतर्कता अपनाउन भनिएको छ ।  बैठकमा  गृहमन्त्री रमेश लेखक, सचिव एकनारायण अर्याल, आइजीपी  वसन्त कुँवर, सशस्त्रका आईजी राजु अर्याल र राष्ट्रिय अनुसन्धान विभागका प्रमुख हुतराज थापा सहभागी थिए ।