गुल्मीको मुसिकोटमा पहिरोले पुरिएर ४ जनाको मृत्यु, २ घाइते

२२ साउन, काठमाडौं । मंगलबार विहान घरमाथिबाट झरेको पहिरोले पुरिएर गुल्मीको मुसिकोटमा ४ जनाको मृत्यु भएको छ । जिल्ला प्रहरी कार्यालय गुल्मीका मुसिकोट नगरपालिकाको वडा नम्बर–१ बिसौनामा पहिरोले २ वटा घर पुरिँदा ४ जनाको मृत्यु भएको अनुसार पहिरोमा पुरिएर २ जना घाइते भएका छन् । 

जिल्ला प्रहरी कार्यालय गुल्मीका प्रहरी निरीक्षक रामकुमार केसीका अनुसार पहिरोमा पुरिएर ४८ वर्षका गोरे बिक, ६७ वर्षका हुमुक बिक, साढे दुई वर्षका रियन्सा बिक र ६६ वर्षकी मसुरी विकको मृत्यु भएको  छ । २३ वर्षकी मुना विक र ३२ वर्षकी विष्णु विकलाई स्थानीयले उद्धार गरेर नजिकैको स्वास्थ्य चौकीमा पयुर्याएका छन् । 

झरी परिरहेको अवस्थामा बिहान घरमाथिबाट लेदोसहितको पहिरोले विष्णु विकको घर र हुकुम विकको घर पुरिएको थियो । पहिरोमा पुरिएकाहरूको उद्धारको लागि प्रहरी सहायक निरीक्षक लखनलाल चौधरीको कमान्डमा ४ जनाको टोली खटिएको थियो । उनीहरुले पहिरो पन्छाएर शव निकालेका हुन् ।