आजदेखि बलाधिकृत रथी सिग्देलको कमाण्डमा नेपाली सेना, बिदामा गए शर्मा

२५ साउन, काठमाडौं । आज शुक्रबारदेखि नेपाली सेनाको कमान्ड बलाधिकृत रथी अशोकराज सिग्देलले सम्हालेका छन् । मन्त्रिपरिषद्को निर्णय बमोजिम राष्ट्रपति रामचन्द्र पौडेलबाट साउन २५ गतेबाट कायममुकायम प्रधानसेनापतिको जिम्मेवारी सम्हाल्ने अख्तियारी पाएका थिए ।

प्रधानसेनापति प्रभुराम शर्मा आज साउन २५ गतेबाट बिदामा बसेका छन् । प्रधानसेनापतिले अवकास पाउनु एक महिना अघिबाट बिदामा बस्ने सैन्य अभ्यास अनुसार शर्मा शुक्रबारबाट बिदामा बसेका हुन् । प्रधानसेनापति शर्माले भदौ २४ गतेबाट अवकास पाउनेछन् । 

प्रधानसेनापति शर्माको तीन वर्षे कार्यकाल २०८१ भदौ २४ गते सकिनेछ । पूर्णचन्द्र थापाले अवकास पाएपछि शर्मा नेपाली सेनाको प्रधानसेनापति भएका थिए । शर्माले २०७८ भदौ २५ गतेबाट प्रधानसेनापतिको जिम्मेवारी सम्मालेका थिए । प्रधानसेनापति शर्माको तीन वर्षे कार्यकालमा विशेष उल्लेख्य कुनै काम देखिएन । दुई–चार वटा कार्यक्रम तथा भवनको उद्घाटन र केही देशको भ्रमणमै उनको कार्यकाल बित्यो । 

सिग्देललाई बिहीबार प्रधानसेनापति महारथी प्रभुराम शर्माले जंगी अड्डामा आयोजित एक समारोहकाबीच प्रधान सेनापतिको कार्यभार बरबुझारथ गरेका थिए । सो अवसरमा शर्माले नेपाली सेनाको सबै तह र तप्काहरूलाई राम्रोसँग बुझेको, नीति नियम र पद्धतिबारे गहन बुझाइ राख्ने, व्यावहारिक एवम् उत्कृष्ट व्यावसायिक क्षमता भएका बलाधिकृत रथी सिग्देललाई आफ्नो उत्तराधिकारीका रूपमा कार्यभार बुझाउन पाएकोमा खुसी व्यक्त गरेका थिए ।