कर बढाएको विरोधमा हेटौंडाका उद्योगी, व्यवसायीले उपमहानगरलाई बुझाए साँचो

३२ साउन, हेटौंडा । करको दायरा बढाएको भन्दै हेटौडाका व्यवसायीहरूले आफ्नो व्यवसायको चाबी हेटौँडा उपमहानगरपालिकालाई बुझाएका छन् । उपमहानगरले व्यवसायीक करको दर ३३ देखि १५० प्रतिशतसम्म बढाएको व्यवसायीको भनाइ छ । 

मकवानपुर उद्योग वाणिज्य संघको नेतृत्वमा सुरु भएको आन्दोलनको पाँचौं दिन आज शुक्रबार आफ्ना व्यवसाय बन्द गरेर साँचो उपमहानगरलाई बुझाएका छन् ।  मेयर मिनाकुमारी लामा र उपमेयर राजेश बानियाँले व्यवसायीको साँचो बुझेका हुन् ।

मकवानपुर उद्योग वाणिज्य संघको नेतृत्वमा भइरहेको कर वृद्धि विरुद्धको आन्दोलनलाई साथ दिंदै व्यवसायीहरूले शुक्रबार आफ्ना व्यवसाय बन्द गरेर उपमहानगर कार्यालयमा धर्ना दिएका हुन् । मेयर र उपमेयरले केही प्रतिनिधिभित्र आउन गरेको आग्रह अस्वीकार गर्दै व्यवसायीहरूले बाहिरै आएर साँचो बुझ्न आग्रह गरेका थिए ।