प्रचण्डले खोले जनार्दन शर्माले माओवादी पार्टी विभाजन गराउन खोजेको कुरा

१ भदौ, काठमाडौं । नेकपा माओवादीका अध्यक्ष पुष्पकमल दाहाल प्रचण्डले पार्टीका उपमहासचिव जनार्दन शर्माले पार्टी विभाजन गराउने कोसिस गरिरहेको भन्ने सूचना आफूसम्म आएको बताएका छन् । उनले शर्मा पार्टी फुटाउन खोजेको भन्ने कुरा आफूसम्म नै आएको र त्यसमा आफूले विस्वास गर्न नसकेको बताएका छन् । उनले अहिले सबै कुरा मिलिसकेकाले अब पार्टी फुट्ने आशंका नगर्न पनि कार्यकर्तामा आग्रह गरेका छन् । 
  
शनिबार पोस्टबहादुर बोगटी स्मृति प्रतिष्ठानको नवौँ वार्षिक साधारणसभामा प्रचण्डले स्थायी समितिको बैठकपछि यो आशंका हटेको बताए । अब पार्टी विभाजन नहुने बरु एकताबद्ध भएर अघि बढ्ने स्पष्ट भएको उनले दावी गरे । उनले पार्टीकै मान्छेले जनार्दनले पार्टी फुटाउँदै छन भनेर सुनाउँदा आफू पनि अचम्ममा परेको बताए । आफू पनि संका गर्ने अवस्थामा पुगिसकेको भन्दै उनले स्थायी समिति बैठकको अन्त्यसम्ममा सबै आशंका हटेर गएको बताए । 

प्रचण्डले शर्मासँग भएको पछिल्लो छलफलमा पनि पार्टीलाई एकताबद्ध बनाएर लैजाने विषयमा नै कुराकानी भएको भन्दै अब शंकट हटेको बताए । स्थायी समिति बैठकमा केही कमरेडले भिन्न ढंगले कुरा राख्नुभएको थियो । कमरेड जनार्दन शर्माले लिखित रूपमा प्रस्तुत गरेको दस्ताबेजमा फरक मत भनेर राख्नुभएको थिएन । त्यहाँ फरक मत भनेर लेखिएको पनि छैन । उहाँले पनि यसलाई आफ्नो मतको रूपमा व्याख्या गर्दै अरूले मुखले भनेको तर आफूले लेखेर ल्याएको भन्नुभयो । त्यो बाहिर जाँदा तरंग भयो, उनले भने । 

फार्टी पुटाउने कुराले पार्टीमा तरंग ल्याइसकेको भन्दै उनले स्थायी समितिको अन्त्यसम्म आइपुग्दा त्यो मुख्य रूपमा सम्बोधन भयो, अब कसैले आशंका गर्नुपर्ने अवस्था नभएको बताए । शर्माले पार्टी फुटाउन खोजेका छन् भनेर लिडरसिपले पनि आशंका गरेको बताए । विभिन्न मानिसहरूले आएर सुनाउँथे– पार्टी फुट्दै छ, फुटाउँदै छन्, विभिन्न तत्व मिलेका छन् । यसले यदाकदा के भयो भन्ने भएको थियो । तर, बैठक अन्त्यसम्म जनार्दन शर्माको पार्टी फुटाउने कुनै उद्देश्य पनि छैन, नियत पनि छैन भनेर उहाँले प्रष्ट पार्नुभयो, प्रचण्डले भने ।