५ वर्षे हदम्याद राखेर भ्रष्टाचारको अनुसन्धान हुन सक्दैन, म नोटअफ डिसेन्ट लेख्छुः केसी

५ भदौ, काठमाडौं । नेपाली कांग्रेस नेता तथा सांसद अर्जुननरसिंह केसीले भ्रष्टाचारको अनुसन्धान गर्ने विषयमा हदम्याद राख्न नसकिने बताएका छन् । उनले भ्रष्टाचार भएको विषय ५ वर्षभित्र अनुसन्धान सकिनुपर्ने र त्यसपछि गर्न नपाइने भन्ने कुरा गर्न नमिल्ने भन्दै हदम्याद राख्ने प्रस्ताव कुनै हालतमा स्वीकार गर्न नसकिने बताएका छन् । 

बुधबार प्रतिनिधि सभाको राज्य व्यवस्था तथा सुशासन समितिको बैठकमा ‘भ्रष्टाचार निवारण ऐन २०५९ को संसोधन बिधेयक’ माथिको छलफलमा उनले यस्तो हदम्याद जस्तो कुरा स्वीकार गर्न नसकिने जनाए । यसले भ्रष्टाचार जोगाउन लागेको भन्ने देखाउँछ, ठूला भ्रस्टाचारका काण्ड छिपाउन लागि परेको भाष्य समाजमा बनाउन खोजिँदैछ । यस्तोबेला कानुन बनाउँदा विशेष ख्याल गर्नुपर्छ यो शब्द हटाउनुपर्छ, उनले भने ।

५ वर्षको हदम्याद राख्ने निर्णय भए आफूले नोट अफ डिसेन्ट लेख्ने केसीको चेतावनी छ । ‘भ्रष्टाचारको अनुसन्धानमा ५ वर्षको हदम्याद राख्ने कुरा भद्दा मजाक हो । कानुनी सजायबाट उन्मुक्ति दिने नियत नै गलत’, सांसद केसीले भने, ‘सबै कालखण्डको भ्रष्टाचार हेर्नुपर्छ । कुनै हालतमा ५ वर्षको हदम्याद स्वीकार्न सकिन्न । भ्रष्टाचारमा अनुसन्धानमा समयसीमा राखे असन्तुष्टि मात्रै होइन विद्रोह जन्मिने उनले बताए । 

कांग्रेसकै अर्का सांसद राजेन्द्र केसीले पनि भ्रस्टाचारको अनुसन्धानमा हदम्याद राख्न नसकिने बताए । बरु अख्तियार दुरुपयोग अनुसन्धान आयोगका आयुक्त नियुक्तिमा समस्या रहेको उनको भनाइ छ । निजामती सेवाबाट अवकाश भएकाहरूलाई अख्तियार मा लैजादा समस्या भएको भनेर प्रश्न उठ्ने गरेको उनले बताए ।