पर्सा प्रहरीको ठूलो उपलब्धि : पहिलो महिनामै ८ करोडभन्दा बढीको भन्सार छली सामान र लागूऔषध बरामद

५ भदौ, वीरगञ्ज । जिल्ला प्रहरी कार्यालय पर्साले चालु आर्थिक वर्षको पहिलो महिनामा आठ करोड ३० लाख भन्दा बढीको भन्सार छली तथा चोरी पैठारीका सामान बरामद गरेको छ । वीरगञ्जसहित पर्सा जिल्लाका विभिन्न स्थानबाट प्रहरीले श्रावण १ गतेदेखि ३२ गतेसम्म आठ करोड ३० लाख ३० हजार २६७ रुपैयाँ बराबरको भन्सार छलीका सामान बरामद गरेको हो । 

पर्सा प्रहरीले पहिलो महिनामै चार करोड ८६ लाख २४ हजार आठ सय रुपैयाँ बराबरको विद्युतीय चुरोट 'इलेक्ट्रिोनिक भेप' बरामद गरेर ठूलो सफलता हात पारेको छ । साउन २५ गते वीरगञ्ज महानगरपालिका वडा नम्बर ६ रेल्वेरोड बस्ने रामप्रसाद बैरेको पक्की घरको कोठाबाट प्रहरीले विद्युतीय चुरोट बरामद गरेको हो । 

उक्त घरमा कोठा भाडामा लिएर बस्ने भारत बिहारका सुदामा प्रसादले अनधिकृत रुपमा भण्डारण गरी राखेको प्रति कार्टुनन दुई सय पिसका दरले ७६ कार्टुनमा रहेको भेप बरामद गरिएको पर्साका प्रमुख प्रहरी उपरीक्षक कुमोद ढुङ्गेलले जानकारी दिए । प्रहरी उपरीक्षक ढुङ्गेलले दिशा निर्देशलाई उपलब्ध गराएको पहिलो महिनाको मासिक कार्य प्रगति प्रतिवेदनअनुसार यही अवधिमा प्रहरीले लागूऔषध सम्बन्धी कसुरमा चार जना महिलासहित ३० जनालाई पक्राउ गरेको छ । 

एक महिनामै पर्साका विभिन्न स्थानबाट प्रहरीले ठूलो परिमाणमा लागूऔषध बरामद गरेको छ । नाईट्राजेपाम १८ ट्याब्लेट, नाईट्राभेट दुई हजार ८५६ ट्याब्लेट, ट्रामाडोल एक लाख २९ हजार ५०४ ट्याब्लेट, फेनारगन एक हजार ४८३ एम्पुल, नुरफिन एक हजार ४९९ एम्पुल, डाइजेपाम एक हजार ४८६ एम्पुल, चरेश १८ किलोग्राम र गाँजा ७६ किलोग्राम बरामद गरिएको प्रहरी उपरीक्षक ढुङगेलले जानकारी दिए । बरामद सामग्री वीरगञ्ज भन्सार कार्यालय र राजस्व अनुसन्धान कार्यालय पथलैया बारामा बुझाइएको छ । 

प्रहरी उपरीक्षक ढुङ्गेलका अनुसार यही अवधिमा विगतका पुराना २६ वटा मुद्दा पनि फर्छौट गर्न पर्सा प्रहरी सफल भएको छ । साथै सामुदायिक प्रहरी साझेदारी कार्यक्रम अन्तर्गत १२७ वटा सचेतनामुलक कार्यक्रम सञ्चालन गरिएको पनि उनले जानकारी दिए । प्रहरीले नागरिकप्रति विश्वास बढाउन तथा प्रहरीप्रतिको भ्रम र डर हटाउनका लागि प्रहरी साझेदारी कार्यक्रम सञ्चालन गरिरहेको उनको भनाई छ । 
ट्राफिक तर्फ यही अवधिमा पर्सामा दुई हजार ६३८ वटा सवारी साधनलाई कारवाही गरिएको छ । जिल्ला ट्राफिक पहरी कार्यालय पर्साले कारवाही र जरिवानाबाट एक महिनामै २१ लाख १३ हजार एक रुपैयाँ राजस्व संकलन गरिएको छ ।