टुंडिखेलमा आयोजित गौरा पर्वमा बालेन समर्थकको शीर्ष नेताविरुद्ध नाराबाजी, मञ्चबाटै गर्जिए देउवा

१० भदौ, काठमाडौं । टुँडिखेलमा आयोजना गरिएको गौरा पर्व मनाउने क्रममा प्रधानमन्त्री केपी शर्मा ओलीसहितका शीर्ष नेताहरु विरुद्ध नाराबाजी भएको छ । काठमाडौं महानगरका मेयर बालेन शाहको नाम लिएर दर्शकको भीडबाट केही युवाहरुले शीर्ष नेताविरुद्ध नारा लगाए । 

गौरा पर्व मनाउने क्रममा प्रधानमन्त्री केपी ओली शर्मा, शेरबहादुर देउवालगायत नेताविरुद्ध नाराबाजी भएको हो । सोमबार टुँडिखेलमा भइरहेको गौरा पर्व विशेष कार्यक्रमा प्रधानमन्त्री केपी शर्मा ओली, शेरबहादुर देउवा, भीम रावललगायत नेताहरु सहभागी थिए । उनीहरुलाई आयोजकले बोलाएका हुन् । 

कार्यक्रममा सहभागी युवाहरूको समूहले मञ्चमा प्रधानमन्त्री ओली उपस्थित भएका बेला नाराबाजी गरे । युवाहरूको समूहले प्रधानमन्त्री ओलीको नाम नै लिएर नाराबाजी गरेका थिए । नाराबाजी गरिरहेका युवाहरूले ’ढुंगा हान, बालेन’ लगायत शब्द उच्चारण गरेका थिए ।

नारावाजी भएपछि कांग्रेस सभापति देउवाले मञ्चबाटै गाली फर्काए । दर्शकदीर्घाबाट हो–हल्ला भएपछि गौरा पर्वको कार्यक्रम विथोल्न खोजिएको भन्दै उनले असन्तुष्टि जनाए । उनले भने, ‘तपाईंहरू जति कराउनुछ कराउनुस् । लाज पनि छैन गौरा पर्वको कार्यक्रम विथोल्ने ? । यही हो नेपालको चलन ? ।

धेरै मानिस गौरा पर्व मनाउन र गौरा खेल्न टुँडिखेलमा आएको तर केहीले विथोल्न खोजेकोले त्यसलाई जनताले ठिक पार्नुपर्ने देउवाले बताए । प्रधानमन्त्री ओलीले नेपाली समाज बहुसांस्कृतिक र शान्तिप्रेमी भएकाले यस समाजलाई बिथोल्ने र भड्काउने प्रयास सफल नहुने बताए ।